有日有兩位病人一入到診所門口就喺度嘈…
小姐向住先生咆哮：「我而家有話唔俾你入咩？你急咩啫？趕住去死呀？」
先生：「你唔係入嚟嘅唔好塞住個門口嘛！」
小姐：「我咩嘢唔入呀？我都係入嚟㗎！我搵緊張身分證咋嘛！」
先生：「都廢事同你嘈！」，之後先生行埋嚟登記處。
落後一步嘅小姐見狀立即衝埋嚟登記處：「仲要打我尖？」
先生：「打咩尖呀又，我行埋嚟先㗎！」
小姐：「我一早已經喺出面㗎啦！」
我一早出咗世添呀～
先生：「你自己企喺出面唔入嚟關我咩事呀下？我入咗嚟先就梗係我登記先㗎啦！」
小姐：「頭先唔係你推開我，我一早入咗嚟啦，姑娘你見到㗎！」
我擰擰頭：「我睇唔到出面係點㗎，啲玻璃望唔到出面㗎」
小姐繼而再向先生咆哮：「你頭先非禮我都未話你呀！」
『非禮』係一個好嚴重嘅指控啊。
先生：「你食屎啦，我駛唔駛非禮你啦？」
小姐：「我唔怕食屎㗎！我食咗好多年屎㗎啦！你唔好打我尖呀下！」
噢，小姐，你係我第一個見咁勇於承認自己食過屎嘅人啊，仲要咁自豪一講食足好多年。先生，睇嚟你都係唔好同佢鬥啦，我怕佢一陣嘈嘈吓興起伸手挖你啲屎嚟食呀。
先生面對住食屎小姐完全不知所措：「…..」唯有退位讓食屎小姐啦。
小姐得戚樣同我講：「哼，好男不與女鬥呀」
點睇都係好男不與食屎女鬥。
好奇心非常旺盛嘅我邊登記邊用奇異眼光望住小姐…
小姐終於發覺我眼神有異：「做咩咁望住我呀你？」
我：「冇…我喺度望緊你…係咪用個口嚟食你頭先講嗰啲嘢….」
小姐：「屎呀嘛？有邊個做阿媽未食過屎㗎？你梗係未生過仔啦！佢喺肚入面嗰陣佢屙咩你都要食㗎啦！」
妖。你呃人！
