關於 南亞股價為何一直跌 ，我們在網路上蒐集到這些相關的討論、資訊與評價

【龔成問答信箱】（Q18661-Q18680）

Q18661：

龔成老師，我係一個20歲既大學生，對未來好迷茫，所以想問下老師意見。

我依家讀緊一課自己無咩興趣既科，當時貪呢科人工好似幾高，無諗過自己讀唔讀得來，結果依家就唔係好讀得來。咁我面前就有兩個選擇

1.QuitU重讀揀過第二科
但係就會晒左時間同錢
因為學費基本上我都係要自己比

2.繼續讀落去，死頂拎個2nd up返來
到依家我都未決定到，所以想問下老師意見
同埋我依家有睇好多投資書

但我依家本金大約得20000幾。本金細投資應該點算。
唔該龔成老師。

龔成老師：

你要從長遠的方向去想，首先，你要清楚翻自己，10年後，你想做咩？你的興趣是甚麼？想到時的方向發展如何？當中的目標。

你要從「10年」的大方向去想。

下一步，就是你寫低先時的2條路，如果第一條路，能否幫你去到10年後的目標？過程怎樣，風險與時間怎樣？

第二條路，也是這樣，你寫低，這路能否幫你去到10年後的目標？過程怎樣。

我地無絕對的的答案，只有你自己，從大方向去想。

至於投資，如果本金唔多，暫時儲多D現金先，唔需要太心急。

------------------------------------------------

Q18662：

謝謝你，龔sir，之前無意之中由太太發現了你的著作，拜讀了大富翁置富之後，慢慢地將你其他著作一一拜讀，好像發現了新世界一樣。

乜香港原來有D咁嘅高人架？跟住上你的堂，學得去計算企業價值及分析之後，讓我這個年頭，獲得不錯的回報，多謝你！

四周有投資的同事也好奇地問，為何市況今年不好，也可以如此鬆容？我常答，怕咩呀？

我知佢價值係邊到，而家守佢3年，如823 , 到時可以財息都收，點解吾做呀？有D可以收一世息添！

而家公司同事也開始拜讀你的著作，嘗試加入作為價值投資者，再炒來炒去，用D時間去學投資。

另外，你的堂收 8800元學費 係非常非常超值，一D都吾貴，希望遲D可以上埋進階班啦！

龔成老師：

太好了！可以今到你地都有真正的財富累積。

其實我的核心投資方法，就是巴菲特的投資方法，這不是我發明，我只是見到佢運用並賺大錢，所以我相信這是最有效的方法。

而我亦相信任何人用都有相同的效果！

保持進步！投資要學的好多，進階班見！

------------------------------------------------

Q18663：

你好 成哥 想問問你 我買入左1手1211 @107 建倉 , 點知一買就跌 , 如果我泥緊每個月月供$1500繼續長揸 ok ma?

另外，1810 我$23開始 建倉 1000 股, 再等18 / 17 加注1000 股 , 還是每月供1手 會穩陣d?

435 , 我3.88 進了15000 股 , 除淨左 , 現在都諗住每月供1手

想問呢3個股既組合長揸月供可以嗎？

謝謝您一直既推介同教識人投資唔係投機！
現金比例方面 , 我有儲蓄 如果月供就不太大影響我既現金比例 如果加注就會影響大d

咁成哥覺得我應加注還是月供？
因為1211 加注 都幾貴

龔成老師：

比亞迪（1211）現價有少少貴，不過有潛力，你有貨可守，坦白講，現價月供未必最適合，但如果你現時有一定的現金，長期，又不是完全不可，因為長期供可以有效將買入價平均。

小米（1810），你有貨可持有，到$18以下加注，可以，記住，唔好太心急，要慢慢入。

陽光（0435）有質素，可持有。

上述都可月供，但你要月供同時，每月有資金剩。

除非你現金好多，否則這刻的月供金額，唔需要過多。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18664：

你好，我係一個投資新手，我有幾隻股票在手

02382舜宇光學科技 123.80入400股
00939建設銀行 7.360入10000股
03988中國銀行(月供大約3年) 2.400入(大約)
月供每月$1000

最近想取消中國銀行的月供，轉想供第二隻，想問你一些意見月供那一隻比較好。

自己本身而家30幾歲，想可以喺幾年內儲到首期大約500,000，我喺投資方面，可以點做，先可以去到依個目標？

龔成老師：

舜宇光學科技（2382）持有及月供無問題，這股有質素，有發展。

建行（0939）同中行（3988）的情況類似，佢有一定的規，不過，增長力不算強，只是一隻收息股，現價在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。

而長遠，會慢慢穩定的，不過，增長力不強。所以，你要睇翻這股是否適合自己的組合。

如果你轉供其他，以你的年齡，可以進取少少，安碩恒生科技（3067）可以考慮。

另外，如果你想完成目標，要進一步加大儲蓄，以及投資能力，從最基本開始。

------------------------------------------------

Q18665：

龔sir你好，請問可否分析吓144招商局港口，我$12 同$10 分別買入，長遠計應否再增持？謝謝你百忙中都願意為我地分析

龔成老師：

招商局港口（0144），本身都算是有質素，不過，近年有關貿易的行業，賺錢能力低左，同埋風險大左。

先講佢的基本面，佢係中國最大，世界領先的港口開發、投資和營運商，係中國沿海主要樞紐港建立了完善的港口網，並成功布局南亞、非洲、歐洲及地中海等地區。

佢有龐大的港口業務，於中國處領先地位，絕對有其優勢。不過，貿易因素受全球及中國經濟情況影響，將令業務出現略波動情況。

另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。

過往股價一般般，長遠來說將平穩，股息則十分穩定，但增長有限，現價有投資價值，但貿易問題對佢股價有波動。

如投資作收息股，可以，但就唔好對股價有太大期望。暫時你唔好增持，原有的貨就可以守。

------------------------------------------------

Q18666：

老師，我早前買了0378,共1.2萬股數@$1.9, 請問這股票潛力如何，我還應該繼續長遠持有嗎？感謝幫忙

龔成老師︰

五龍動力（0378）主要從事研發、生產及交易用於鋰離子電池之正極材料和相關投資。

單睇業務數據，此股連年虧損。2019年核數師更"不表示意見"，代表盤數有機會有問題。

我初步睇資料，見佢有一些被提交清盤事宜，這股不宜持有。

------------------------------------------------

Q18667：

CRO版塊 你認為前景如何？選CRO還是生物製藥好? 另3347 2269那隻好一點？想選一隻作長線 什麼價可入？

龔成老師︰

CRO即是Contract Research Organization的，即是合同研究组識。簡單來講，就是業務是醫藥研發合同外判的研究類別公司。

CRO版塊同藥業前景都正面，但投資邊個好，唔係單睇行業，企業本質都好重要。

泰格醫藥（3347）係中國的綜合生物製藥研發服務提供商，主要經營臨床試驗技術服務，例如提供臨床試驗運作服務，包括藥物及醫療器械臨床研究，業務發展都唔差，同時都有一定的規模。

生意與盈利都有理想增長，賺錢能力唔差，不過上市時間唔長，數據的參考價值會減。

質素都有，長遠發展正面的，不過股價潛在波動較大，加上上市時間唔算長，唔建議投資太多。

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平。如果之後有高增長，那就未算太貴。

所以你投資係可以，但要控制注碼，小注好了。同時，你要明白業務有不確定性和股價會好波動。

------------------------------------------------

Q18668：

老師你好～睇到老師page嘅分享，都好想可以學下點樣投資同儲蓄。但由於工作時間唔固定，所以暫時報唔到班。希望老師可以指點一下。

我今年26歲，初出茅廬，無父幹，月薪大約20000蚊左右。希望可以靠自己儲存到首期買居屋自住。
想知可以買你邊本書學習一下先？

知道儲蓄係需要時間，無本錢就無辦法做投資。希望係儲蓄期間，可以了解更多股票、樓市投資嘅知識，謝謝你

其實兩萬蚊月薪，學人講上車係咪好天方夜譚？
希望30歲左右可以有首樓買居屋。

龔成老師︰

兩萬蚊月薪，上車唔係天方夜譚。問題係你願意用幾多努力，去成就這件事。簡單咁講，係你有幾想自已"成功"。

首先，你要努力令每月剩出一些錢，去投資優質股。之後，一步步咁由儲股，到買細屋，最後到你心目中架DREAM HOUSE。

詳細點做，你可以睇我新出的《5年買樓4部曲》。另外，推薦你睇埋《財務自由行》和《大富翁致富藍圖》，會對你長線有幫助。

現時你先要做就係用"平穏增長股" + "潛力股"，去創造一個增值組合。用你每月儲到的錢5成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、港交所（0388）、粵海（0270）、領展（0823）、希慎（0014）、太古地產（1972）

或潛力股︰南方恒生科技ETF（3033）、阿里（9988）、騰訊（0700）比亞迪（1211），中生（1177）、福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

雖然而家上唔倒我堂，但唔好因為咁而停止學習。要努力睇多D相關架書、新聞、年報，去提升自已財務知識，希望有一天在課堂上見倒你。

------------------------------------------------

Q18669：

老師，你好。求指引，我持有521 CWT INT’L 1,400,000股，均價$0.40。

之前停牌，復牌當日仲有升幅，滿心歡喜，所以繼續持有。

但之後經跌穿0.10，心驚膽顫下放了一半持股，當日收報0.101。

請問我應該繼續持有，抑或忍痛止蝕離場？
求指引，謝謝你

龔成老師：

CWT INT'L（0521）的獨立核數師意見，2016年「保留意見」，2018年「不表示意見」。這反映佢盤數十分有可疑！

另外，這企業年年虧損，點解要持有一盤持續虧損的生意？

這類股，當然是賣出！

------------------------------------------------

Q18670：

老師：我想請教808,之前無知3.35入,我吾知點算,好幾年前高位入了5, 入了3, 966,全蝕大錢,好灰.

龔成老師：

泓富產業信託（0808）有得守的，只是疫情令業務中短期不利，你可以長期持有的，佢持有物業，總有一定的價值，只是時間問題，不用擔心。

至於匯豐（0005），賺錢能力弱左，不過經濟好翻後佢都會上翻d。至於煤氣（0003）有得守。

中國太平（0966）不過不失，如果持貨不多都可以守下，但增長力弱左。

------------------------------------------------

Q18671：

242 2.73 重入有d擔心

龔成老師：

信德集團（0242）你預疫情對佢有一定影響，中短期都會弱，要長遠先慢慢好轉。

這股不是無質素，之後會平穩增長。但最大的問題是你持貨多，第一，單一股票唔值得持貨太多，第二，這股的質素不是最高級類別，因此又唔值得佔組合比例太多。你可以要見到反彈時適度減持。

------------------------------------------------

Q18672：

老師，如果我現在不供比亞迪後，月供1177，1928及9988
另外加注2800多$500，你覺得可以嗎？

另外，我見龔sir你有介紹3088及1830

呢兩隻如果我每個月一手一手買，是否也可以呢？

龔成老師：

如果停月供比亞迪（1211），你轉另外3股，可以的，加注盈富（2800）都得。

至於必瘦站（1830），你分注投資可以，但這股又未值得持貨過多，你要控制好注碼。

華夏恒生科技（3088）你月供或自行分注入，都可以，這基金好適合慢慢儲貨，長遠投資。另外，同類基金最近有一隻新的，你可以比較下，安碩恒生科技（3067），都是追蹤同一指數的。

但要留意，唔好太急用盡資金，要同時有一定的現金在手。

------------------------------------------------

Q18673：

成哥你好，關於我作投資果間物業，其實係18年樓花買入，奧運納米樓一房，雖然現時收租可以cover到供款，但以呎價25500/呎

有感將來升幅都會比較慢，同埋我俾咗5成首期，所以打算下年夠三年之後平手賣咗佢，拎返啲錢投資股票。因為感覺上我係買錯盤

我嗰度係第二期，佢嚟緊成個項目會起10期，發展大角咀重建，但似乎短時間升幅真係好慢，我已經曬咗四年時間

唔想再宅啲錢喺度，如果平手都拎返350萬首期，好似會有更好用途，你是否同意？

龔成老師：

香港樓，中短期有機會向下，但不會大跌，之後就會向上，平穩增長。

如果你本身有自住樓，而這物業只是投資，你賣出都可以（我不建議賣自住樓）。你賣出投資物業，將資金轉投資其他更有增長力的工具，不是不可。

但我會比較建議你想清楚先行動，因為買賣物業的成本高，不同股票，你每一個決定，都要想清楚，盡量以長線為策略。

------------------------------------------------

Q18674：

龔sir，這刻我有留意5g 概念 包括 552 788, 因相信未來5g 發展.

想請問如果 1970 和 5g 概念股, 現在這刻可以入哪一個範疇?

如選擇5g 概念股, 應該揀 552 定 788好? thanks!

另外小弟早前聽從龔sir 意見月供1211, 成功收穫第一隻倍升股, 十分感謝!!

龔成老師：

5G是長遠有發展的方向，你的確可以留意，中國通信服務（0552）、中國鐵塔（0788）都得，但未必是好高增長的類別，因為好多相關因素與預期，都已經在股價上反映。

因此，是有投資價值的股，但股價增長的速度，就好睇之後5G發展有幾勁。中國鐵塔會穩陣少少。

IMAX CHINA（1970）都有質素的，不過中短期一定弱，長遠會好轉，但賺錢能力比過往略減。

比亞迪（1211）太好了，月供收成倍升股，是你過往努力儲貨的成果！

------------------------------------------------

Q18675：

龔Sir你好，最好開始拜讀您的著作，希望理財及致富方面有所得著，亦多謝您在Facebook的分享。

年半前(2019年4月)因為公司結業得到賠償，於$0.68買入97 三十萬股收息，現在派息減半且價格持續低迷，應否繼續持有？

另外之前月供005，現持有七手，平均買入價$67.3，應否繼續持有希望遲些恢復派息？

現在月供只有1038，每月三千，應否增加供款？或供多一兩隻潛力股令整個組合有合理增長？之前供過66，應否重新開始？又或者應加醫藥股或保險平衡一下？

此外，持有一手9988(ipo)，七手1810(平均$11.46)，七手3033($7.865)及兩手981(平均$23.77)。3033是否應搵機會換3088?

謝謝解答

龔成老師：

你應該建立一個更好的財富配置，要適合你，以及長期性的。

首先，你要睇翻你自己，現時想集中收息，低風險地得到現金流，還是想有財富增值，自己承受風險的程度如何。

恒基發展（0097）、長建（1038）、匯豐（0005），你預只是收息股，股價未必有理想的升幅，長遠會有正常的派息，但中短期會較一般。

你可以平衡的分配，但就唔值得持有過多。

至於小米（1810）等幾隻最近入的股，則是潛力股，與你原有的持股類好不同，因此，你要先清楚自己的財富組合方向，並不能一時一樣。當中的質素無問題，但你要先清楚你的方向。

至於追蹤恆生科技指數的ETF，最近有一隻新的安碩恒生科技（3067），管理費更低，你可以考慮。

------------------------------------------------

Q18676：

龔sir你好，請問中信(267)、雅生活(3319)、鐵塔(788)值得投資嗎？

呢3隻嘅合理價係幾多？咩價位先算便宜區？

另多謝你推介比亞迪！

龔成老師：

比亞迪（1211）太好了！希望幫到你財富增值。

中信股份（0267）中等，質素不是無，但不能稱為好強，加上增長力比過往年代減左，因此投資價值不算高。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

當然，行業有時會有較大的炒作，股價上落大，要注意風險，而整體是有長線投資價值的。現價合理區中上部。

中國鐵塔（0788）本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理價。

由於這股有發展力，可長線。

但如這刻買入，分注入可以的。

------------------------------------------------

Q18677：

想問你點睇信義系既股票及福萊特玻璃？

龔成老師：

信義系，絕對有質素，系內幾隻股票，都是優質股，同時仍有增長力，都是值得投資。

至於福萊特玻璃（6865）有質素。

佢主要在中國生產及銷售光伏玻璃，此外，亦生產及銷售浮法玻璃、家居玻璃及工程玻璃，並向中國大陸、日本、新加坡、韓國、台灣、德國及美國等地客戶，銷售產品。

睇翻佢的資料，佢的光伏玻璃產品主要用於生產晶體硅光伏電池，以及用作薄膜光伏電池的蓋板，而佢的生產設施位於浙江省嘉興市。

無論生意與盈利都增長理想，財務數據正面，這股值得長線投資。唯一擔心的就是估值問題，始終現價唔算平，近期股價有時在合理區頂，有時略貴。如果投資，可以小注慢慢分注，不建議這刻大注。

------------------------------------------------

Q18678：

龔老師，你好，我在2019年6月以6.9買入6000股1800（中交建），當時以為價格合理，点知2019至今一直跌，一起始以為內地基建良好，呢隻可以穩定收息...
而近期佢同內銀都跌成咁，好傷心！求老師指導及分析下1800的前景

老師，見到好手上的中交同內銀咁，好傷心，明明年初至七月都無咁差，我本身打算揸住收息！但見到股價已跌20-30%... 加埋有

1800- 現價4.1 （買入6.9，6手）
939 - 現價 5.02 （買入均價6.33，7手）
1398 - 現價 3.99 （買入均價5.78元）
我真的不知道可以點

我是31歲，由2018至今年左右分别買入，當時本來打算收息，但目前市况太差，一跌跌成咁

其實內銀之前已問過你了，主要是近期市况令人不知所措

龔成老師：

其實以你的年齡，上述3股都不是最適合你的，因為這3股都偏向收息，而你年齡適合增長，加上中國經濟轉弱，上述股都受影響。

中國交通建設（1800）本身不是無質素，但又未去到好好，算是中等類別，但增長力不強。

負債高是扣分的地方，因此估值不會高，股價都反映了相關風險，要上翻去不是短期事，守住先不是不可，但你要預佢增長力不強，可能影響左你資金的增長，你可考慮等佢反彈較多時，將部分資金轉其他更有增力的股。

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。

而長遠，會慢慢穩定的，不過，增長力不強。工行（1398）都有類似情況。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

上述股守不是無問題，但可能會影響左你整個財富的增長，你要平衡這點。

------------------------------------------------

Q18679：

老師，我買左你本買樓4部曲
我睇左共15間樓

最近睇左間單位XXXX
實尺410

BEA boc 估600
Hsbc hsb scb 估690
業主開價650

最後offer 625.8m 但要借多比佢3個月住
另一offer 635m 正常交吉
老師，我應該如何選擇？

因為我見到一些agent post 608m
618m

但業主話佢簽賣樓紙都係650m，無應承過呢啲價
因為咁，我覺得自己會買貴左

補充返
每月供款要21XXX
扣除所有供樓同洗費
可儲8千左右

我計劃要小朋友
都有D 擔心, 供呢層樓太大負責擔

龔成老師：

你大量睇樓，方向正確，我不是好熟識當區，你最緊要比較翻同區同類的成交，以及銀行估價。

至於agent post的價，信唔過的。

你要計一計個呎價，預期租金回報率，比較翻其他近期成交單位，先推算到該價是合理價。

如果多間銀行估足價，一般都唔算太貴。

至於你話邊個offer，其實可以比佢住多3個月，初步睇是著數少少。

另外，能夠持續供得到，是最重要的考慮因素，你要衡量自己的能力。樓價升跌不是最關鍵位，你能夠供款方面無問題，這點最重要。

------------------------------------------------

Q18680：

我之前買了1937

龔成老師：

坦白講，佳辰控股（1937）無乜質素，賣出是最好的方法，一間好普通，同時發展力不強的公司。

佢上市後的中期業績已經大跌，反映可能上市前的數據執靚過。

從業務上，賣出較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16661-Q16680）

Q16661：

你好，龔sir
天能動力仲有無得升？現在可以入？
謝謝

龔成老師：

天能動力（0819）有質素的，同時業務仍在增長中。是潛力股。

佢主要係中國從事研發、生產和銷售新能源鋰動力電池、特殊用途鉛動力電池、電動自行車鉛動力電池；廢舊電池回收處理；以及智慧能源解決方案業務。

這股在我書《50股》系列中有推過，業務都正面的，但盈利就比較波動，因為幾年前曾出現過虧損，這是扣分的地方。近幾年已無這問題，見佢生意同盈利都有理想增長。

不過，這股業務始終有潛在波動，股價上落大，加上現價比出書推介時升左幾倍，就算長線正票，這刻值博率都唔高，等回翻d先考慮會較好。就算投資，都只能小注。

------------------------------------------------

Q16662：

成哥你好，本人鍾情濠賭股，於$31.3買入一手金沙中國，知道金沙主題式經營博彩+娛樂場的方式最令人吸引及賺錢，展望將來亦會翻新金沙城中心為倫敦人等等

但我有點貪心，澳博880 是唯一未於路氹插旗既賭牌營運商，而且多年來佈局澳門半島，被銀娛搶去大量市佔率。

但展望佢有上葡京登場，非博彩元素佔95%（梁安琪聲稱），覺得澳博會有一個大升既機會，但如果買埋澳博會唔會好貪心同分散左。謝謝

龔成老師：

澳門賭業股有質素，可長線持有。

金沙（1928）有投資價值，你可長線。

至於澳博（0880），上葡京的確是動力來源，這有可能帶動股價有向上的動力。這股都有投資的價值，現價合理，都有投資價值。

但你要留意翻，同一行業佔你股票組合的比例，不能過多。如果你這方面控制到，同時投資兩股無問題。

------------------------------------------------

Q16663：

老師，你覺得延期年金値得買？

我從事敎育，有一個9歲小朋友，供緊樓欠銀行$230萬，因今年年金有$60000可以用來扣税，但因先生工作不穏定，最近失業又供緊樓？

我又不想比年金束住，又不想比重稅，有無其他更好方法？

龔成老師：

延期年金較適合在職人士，等你係年輕時以分期儲蓄方式累積資金，並係退休時把資金轉化為穩定年金收入，以供退休生活之用，而合資格的延期年金產品保費更可享稅務扣除。

我地理財，應該攻守兼備，你可以視乎你的風險度，決定買唔買。我建議如果你理財較差，就應該買。但如果你懂理財，懂投資，月供股票可以更幫到你財富增值。

不過，如果你不想被這項目鎖死資金多年，而希望有一定的資金靈活性，就不要買了。

------------------------------------------------

Q16664：

成哥，可否在fb分享下對思捷環球33O的看法，我是新手，沒有入呢隻，但睇番以前，它曾上過$12O元高位，聽說曾經是股王，為何現在会咁底?

如果有人在高位$1xx買，應在那個位忍痛止蝕?因本人成日不肯止蝕，成日以為會返家鄉。謝謝

龔成老師：

首先，有一個重要的概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

當企業的質素改變，價值都會改變，你試想想，如果你在$120買入某股，而這股只值$10，現價在$50，你現價止蝕當然有著數。

你要學懂分析企業的質素、前景，如果面對質素不好，或價值持續向下的企業時，就要做止蝕這動作。

------------------------------------------------

Q16665：

龔sir 我係你股票班學生 知道你主要集中投資港股 我其實一直都對美股有興趣 不過呢段時間比較忙 未抽到時間去研究

我唔知道之後美國既股市會點 不過如果佢仲會跌我都希望可以把握呢個機會投資一下 我完全冇買過美股所以睇下你可唔可以比d意見我

1）如果唔熟悉美國市場係咪買美國ETF比較穩陣？

2）見之前巴菲特係年報會上都有推薦ETF 你有冇覺得邊隻比較好？

3）我見QQQ呢隻係追蹤納指100 佢主要成分股係apple Microsoft facebook等等 我自己覺得呢幾間公司都好出色 （不過坦白講未深入研究呢d公司）

你覺得我應該買QQQ好 定分開咁買個股好？
Thanks!

龔成老師：

1）其實，只要是有質素的企業，都可以投資，美股、港股都是。但我地投資前有個大前題，就是「只投資自己熟識的企業」，由於我較熟識港股，同時推介股票有較大的責任，所以無特別講美股。

如果真的不熟識，不如投資ETF，對個別股份睇好，小注投資都可以。

2）領航標普五百（3140）可投資，這是追蹤美股的，有質素，現價合理，可以分注。

3）我無特別研究，但納指100都是有質素，同時有增長力的股票，你投資相關指數，可以的。我會建議投資ETF好過個股。

------------------------------------------------

Q16666：

想請問龔sir如果我有一直進行66、823兩股的月供股票。

係股票處於合理水平時我係咪唔需要額外加碼？等到真處於平易水平下才加碼？

另外都想問就係如何計算企業的價值，從而知道現在處於平易、合理買是昂貴的水平呢？

因為我看完你的5本書後仍然不太懂得

龔成老師：

如果這兩股，已經佔了你組合的一定比例，建議你等平先加注，正常時期，月供就得。如果這兩股佔你組合比例仍好少，你就可以加。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

因為計算價值，往往要運用最新的大環境去分析計算，所以書本都會較難表達。

------------------------------------------------

Q16667：

老師你好1.請問你對物管股點睇 例如 永升生活 雅生活 中海物業前景點睇 現價貴嗎?

2.另外美團和平安好醫生這兩隻股票質素都不錯 但現價都似乎貴?長遠點睇?

謝謝老師

龔成老師：

1）物管股是有質素的行業，現金流強，加上有增長力，同時中國這市場仍處於一個理想的增長，可以留意相關股票。

永升生活服務（1995）現價唔平，雖然增長力不差，本身正面，但這刻的投資值博率一般。

雅生活（3319）有質素，這股有長線持有的價值，現價略貴，但如果小注，仍是可以的。

2）這兩股都有潛力，但現價都有風險。你可以小小注，等回先正式分注投資。

美團（3690）開始有正現金流，而平安好醫生（1833）我就一直都睇好，都是有長線投資價值的股票。

------------------------------------------------

Q16668：

老師，我眼見自己都30歲，做咗十幾年野，離開香港工作後人工仲低過喺香港(萬六港紙都無)，而其他在這裡的香港朋友人工過一半

加上疫情，啲獵頭公司直情打去各大企業話如果依家肯請人，人工方面有得傾，自己都好驚會失業，手上現金唔多

想投資但在疫情情況底下又唔知從何入手好，強積金都蝕了部分

龔成老師：

我地理財，一定要攻守兼備，你要做好防守，之後先可以進攻。

如果你對前景有擔心，就要預留較多的應急錢，餘下的資金就可以進行投資。手上現金唔多，就唔好投資了。

你現時30歲，仍是一個事業增長的年期，你可以嘗試不同的工作，睇下有無機會突破，你應該一邊做現時的工作，一邊尋找各種發展機會。

------------------------------------------------

Q16669：

最近我被公司裁員，之前亦跟先生商量過暫時不會找新工作，留在家中湊女，想每月買股票賺返啲洗費

手上有恒生$126.4 入持800股，中銀$21.5 入持1500股，如果想再入D短炒，有什麼意見？謝謝

龔成老師：

首先，你地的家庭收入現時減少左，在理財的角度，應該減少風險，而投資股票應該以「閒錢」進行，因此，你應先計算自己的家庭情況，了解翻投資股票是否適合自己。

另外，買股票短炒好難賺錢的，這個要小心。

最好用「長線投資令財富增長、收息的角度進行」，而不是追求「不斷短炒以得到每月費用」。

上述的銀行股，都是有質素的，但只建議長線。

------------------------------------------------

Q16670：

龔成老師，你好！
機緣巧合近兩個月才閱讀到老師的專欄，真有點相逢恨晚的感覺。

現在才知道自己以往的投資方式是不對的，也沒有明確的方向。

從此每天都會看老師的專欄，也準備買老師推介的書，一步一步開始學習投資。當我看完老師的書後，下一步便打算報老師的投資班。

老師教人投資的方式很踏實，很符合我的理念，令我開始理出一個適合自己家庭的投資組合，老師真的幫助了很多不懂得投資是什麼一回事的人。

現想請教一下老師，哪一間銀行的月供股票的碎股也可以市價沽出？哪一間是以$500作單位？因我問過滙豐，它是以$1000起作單位。謝謝老師抽空解答

龔成老師：

你已經行在正確的方向，保持進步就得，理財是一個長期戰，而你的財富將會同你的知識，成正比！

如果我無記錯，中銀香港做的月供股票，佢比你的，你可以問下，而南洋商業銀行，你都可以問下。

希望日後在股票班見到你！

------------------------------------------------

Q16671：

老師您好，本人今年25歲，月薪1萬4，銀行積蓄有18萬，做緊定存，有買儲蓄保，一年2萬5，供左2年，供到第5年就得。

最近想試下月供股票，本人想係27歲前靠股票儲多20萬（當然可能會賠錢），如果每月拎3千去買股票，會唔會太少？

應該要投資幾多錢最好，本人平時洗費唔大，同埋因為冇咩經驗，想問買邊幾隻最好？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

儲蓄保是防守性產品，而我地理財，應該攻守兼備，做好防守後，就要善用資金進行。

相信你是投資初階者，暫時可以先月供股票，以累積的模式進行。

你這年齡，可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000。$3000始終較少，同時你這刻不是無現金。

你可以考慮盈富（2800）$2000。

另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

你現時有一定的現金，其實可以好好運用，暫時就以月供的模式去進行。

------------------------------------------------

Q16672：

龔成老師，你好！

1）請問你點睇981的發展？

2）我目前持有一手76元成本的匯豐，但呢呢期冇派息都唔知點好..老師有冇好嘅建議？

3）700同388呢啲股票現價可唔可以買入？
因為我目前想盡快儲一筆首期買樓..所以不想投資係年期太長嘅股票度

（本人身在澳門，對老師的課程有興趣，期待開班)
另外..經常有留意留意老師在Facebook上回答的問題,覺得老師很用心

龔成老師：

1）中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等，但有潛在的增長力。

另外，此股近期升了不少，現時市盈率已經去到近好高，明顯係貴的水平。此股質素和吸引力一般，你小注可以，但要等佢回落翻較多才好落注。

2）買入價只是一個心理因素。

匯豐（0005）只是一隻收息股，你預股價要好長時間先可以翻到上去。你要睇翻自己的組合分配，如果這比例持有收息股，而增長力不強，是否無問題。

雖然佢今年不派息，但之後會派翻，這股仍是收息股。

3）這兩股可以投資，但都唔建議年期太短。如果你打算1、2年內買樓，應該持有較多現金，因為無人知你要買樓時，股票市場的情況。

我上年都開左2次澳門班，今年可能在9月，但都要睇疫情。

------------------------------------------------

Q16673：

老師你好，本人31歲，3年前因生意失敗負債870,000，最近還清債項希望重新儲蓄，因工作關係未能上課，不過買左財務自由行，80後的二百萬富翁

只有月供股票概念，除此之外對增加財富無從入手，以下是個人背景資料，本人月入18000至25000，扣除開支，家用及保險，可儲蓄8000到10000

無任何現金儲蓄，現有以下幾個問題，希望得到老師的指點

1)如我想5年內有$1,000,000， 現在開始月供$5000盈富基金，$1500比亞迪及$1500領展，另外月儲$2000作流動資金，5年後能做到嗎？

2) 只保留$2000作後備資金會否太少？

3)5年後如何計算之前供股的盈虧？

4)經常看到老師月供股票要長線投資，假若供滿5年後我應該如何確定是否放出股票或應繼續月供？

5)除月供股票外，因經歷過生意失敗，本人投資取向偏向保守，但知道自己的年紀可以偏向進取，老師可否提供其他增值資產方法？

6)我應看哪些入門書令我增加知識，例如何謂優質股，股票合理價，市盈率，等等

問題實在太多，多謝老師的回答！最後有幸在這3年還款期中遇到老師，令我重點希望，實在不勝感激！

龔成老師：

過去的無辦法，但你會因此而得到比同年人，更好的經歷，只要之後努力，好快會追過佢地。

1）建議你每月品供$6000，因為你這刻現金不多，應該留多少少現金，到有一定的數目後，才加大至$8000。這3股無問題，可月供。

我擔心你太急進，反而不是好事，投資要有過程、耐心。

至於5年能否累積到$100萬，除了睇這幾隻股的表現外，你如何運用餘下現金，能否選有優質度的股票，能否在較平的價位買入，都是關鍵因素。一般來說，累積到$70萬-$90萬較合理。

2）對。

3）正式計要計時間值，比較複雜。但你可以用較簡單的方法，計算自己投入了多少資金，以及到時的股票市值是多少。

4）最重要睇企業質素，如果企業有質素，你可以一直供，長線持有。另外要睇你的投資目標，到時想增值？還息？到時該股是否合你的投資目標。

5）你投資「平穩增值股」就得，潛力股就小注，甚至不投資。

盈富基金、領展都是平穩增長類。比亞迪則是潛力股，你要衡量自己的風險承受能力。

6）你可以睇《股票勝經》，之後再睇《選股勝經》《年報勝經》。

------------------------------------------------

Q16674：

你好，我今年47歲，每月收入33,000, 一直没儲蓄習慣，月月清。最近開始醒覺，想開了儲蓄投資，我每月應該可以儲10,000.

看了你的一些文章, 打算月供股票 6,000, 中銀，煤氣，盈富各2,000. 餘下4,000 儲現金。

這個方案你覺得合適嗎? 還是由於我比人遲起步，需要進取一點，如果是這樣，有什麼建議?

最後，我想買你的書看，但我這樣的新手，應該先看你那個作品?

龔成老師：

你這年齡，財富仍有增長力，但就不是高增長，因此，投資不會太進取，以「平穩增值股」為主就得。

你上述的3股，都是有質素，是平穩增值股，可以進行。

建議你盈富（2800）$3000餘下兩隻各$1500。餘下$4000儲現金，一來備用，二來等投資機會。

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q16675：

你好老師, 想問問宏利(00945)這股如何, 看見它的市盈率是6, 是便宜區嗎? THX

龔成老師：

當投資者進行保險企業估值時，唔會單單用市盈率的，會用一些保險企業獨有的指標，這方面我在進階班會教。

另外，當你分析佢的市盈率，你要明白佢盈利的結構，因為佢的業務，可以分開兩部分為企業帶來盈利貢獻，第一是保險的業務，第二是投資的部分，而這部分會比較波動，所以在計算時，要小心分析。

整體來說，宏利（0945）有一定的質素，現價在合理區中下部，可以分注投資。

------------------------------------------------

Q16676：

阿Sir，
好想知道第一堂的功課,第一條題目怎樣計算出$2610萬

題目:每月投資$5000， 每年保持投入資金$60000, 30年後複息回報率15%，30年後滾存財富 $2610萬

我想知道

1. 實際計算方法
2. 如何有另一個方法可以取代計算方法得知結果
（
因為假設我真的不知道怎樣計算答案時可以用此方法取代？)
Sorry ar因為我計數好差架所以麻煩你

龔成老師：

你先睇翻第一堂筆記第11版，有一個複利息表（每年投入$12000）。

你利用複利息表的，找出「15%」、「30年」。
你可以見佢找出表中的數目$522萬。

這表中顯示如果每年投入$12000就滾存$522萬。而現時的題目，假設現在每年投入$60000，你只需要將$522萬X5，最終滾存數目為$2610萬。

------------------------------------------------

Q16677：

老師，最近睇你既資訊，少左提2382(舜宇）同2020(安踏），係咪佢地而家已經唔值得投資呢？

龔成老師：

放心，這兩股仍是優質股，只是由於近年安踏（2020）升了不少，已到了略貴的水平，因此沒有講太多，但長線持有無問題。至於舜宇（2382），相信只是剛巧沒有講述的。

兩隻都是《50股》系列所推介的股票，都可以長線持有。無問題。

------------------------------------------------

Q16678：

老師早晨,我亞媽N年前（佢都唔記得買咗）買咗1800,而家有十手,期間都唔知有冇收過佢股息,而家共有10986股,請問應唔應該放咗佢？麻煩晒

龔成老師：

中交建（1800）不是全無質素，但近年賺錢能力有所減少，這股不是高增長股，之後只會平穩增長，現時估值合理，如果你在過往較高位買入，要上翻去可能要有少少耐性。

暫時都唔好對股價有太大期望，目標只是收息，你預股價上得較慢，負債較高，因此市場估值都不會太高。

如果這股佔比太多，又或想組合多翻D增長力，可以考慮賣出一半。轉去其他更優質及更有增長力的股票。

------------------------------------------------

Q16679：

老師你好，剛睇完你對中銀香港的分析，請問中銀香港與中國銀行兩者可以點樣取捨。

我留意到中國銀行近幾年的股價都十分平穩冇太大的上升及回落，是否該股票的前景不夠中銀香港好？

龔成老師：

中銀香港（2388）的增長力會較好，這由於佢業務的發展，佢在香港的地位，本身有獨特性，同時加大發展東南亞市場，當然，這同時會令佢的風險度增加。

至於中行（3988），只是收息股，唔好預期有增長力，本身規模大，同時業務增長慢，另外考慮到潛在的壞賬，都令股價增長受壓。

------------------------------------------------

Q16680：

龔sir，我一直擺脫唔到窮人思維...有多次買入同一隻股後很快在短時間賣出獲利（不多），富爸爸有錢有理中提及情商財商中

很多人都是情感多於技術，我便一直置身其中，想請教如何做到理智大於情感的思維？謝謝指教

龔成老師：

首先，你要有一定的財務知識，點解我在股票班第一堂，要教同學「財富系統」，就是要佢地明白，唔好短炒，要長線持有資產，而這正是「知識」。

所以，你首先要增加知識，你先會明原來自己的方法，根本無可能賺到大錢，只能賺到同散戶一樣的小錢。

另外，你要學習訓練自己，買入後分析「企業」，而不是「睇股價」。你可以試下買入一間優質企業後，一個月唔好睇股價。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15081-Q15100）

Q15081：

阿sir!唔好意思，想請教下睇年報問題，上堂學過要睇負債比率，總負債除總資產。

想問下account payable, account receivable都要計入嗎?

我見經濟通的財務比率全部都計曬，但account receivable可能收唔到變壞帳，定係計算時應該剔除佢地?因為計唔計會影響個比率

龔成老師：

其實負債比率有兩個：

總負債除總資產
總負債除股東權益

至於你上述所講的項目，都要計算的。其實每項資產都有佢當中的風險，例如存貨，都會擔心唔值錢，賣唔出，所以，這些財務比率，只是一個入門給投資者了解企業的財務指標，令我地可以好快知道企業的情況。

但當我地進一步分析企業時，就要睇翻財務報表，仔細了解資產與負債的問題，這時就要關心你上述所講的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15082：

請問月供股票是長線投資，但人生每個階段都可能要突然需要一筆錢，例如買樓，結婚，醫病，留學，生BB等，所以實有機會中途需要沽出部份股票套現，但問題是如果要錢時遇正股災，最後多年既投資咪化為污有？

龔成老師：

一般會建議月供部分，是假設你中短期都唔用的，即是說，你應該月供，同時儲現金（以供特別用途）。

所以，月供可以話是用作閒錢去供，一般是3-5年，甚至更長。

如果要動用資金，最好預早計劃，例如打算月供5年後買樓，當你準備買樓的前一年，如果要動用到月供裡的股票套現，就要開始準備，不要在買樓需要的一刻才賣股票，要預早，在貴的位置，又或分注模式去賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15083：

老師！ 身體健康 ！心想事成！ 百毒不侵 ！

想請問下恒生 ，中銀香港， 那一隻較佳， 佢哋合理區便宜區喺邊度！ 領展，恆基 又在邊度？ 盈富基金？

致富， 莎莎， 中石化 邊隻收息會好啲 佢哋個區域又係點區分！ 銀河同金沙 佢哋個區就係幾時到位？

依家返工每日見到啲客人只有平時嘅一兩成， 比海嘯嗰陣時影響更大， 公司 緊縮政策 開始， 真係有啲擔心， 不過我都會相信老師呢啲係中短期影響！

老師！香港經過呢兩次 重大事件重創 ， 會唔會本質已經有變！ 你會唔會轉 而投資其他地方嘅股票！ 最後 感謝老師 百忙之中 回覆我咁多嘅問題

龔成老師：

恆生（0011）收息較好，中銀香港（2388）增長力略高。

現價都合理，可以分注，你預跌多1、2成先平宜。

只外，如果你想投資收息股，可以考慮建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

零售、旅遊是今次的重災區，預期中短期都會好弱，但如果從長線投資的角度，以3年後的業務情況如何？作為分析點，就有機會是長線投資者的機會。當然，我不建議這類股大注，始終中短期風險相對較高。

至於香港，貿戰、反送中、肺炎，對香港影響好大，但未去到核心性。只要以「3年作為分析點」，預期香港是回復正常的，但中短期一定會好傷。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15084：

龔老師，請問999 I.T現價好似好便宜？

你認為值得買入長期放係度嗎?佢pe 5都未到，息率10%，謝謝

龔成老師：

I.T（999）雖然市盈率好低，但佢的數據，是上年度的，即是上年的盈利計，市盈率只有5倍，但如果計及最新一個年度的情況，預期盈利大跌，情況就會不同，因為佢最新公布的中期業績，已經出現了虧損。

如果以近年較弱一年的經營環境作參考，2016年，因為當年中國經濟轉弱，香港市道較一般，算是較反映未來1、2年香港的市道，當時佢賺$2億，以這數據推算，市盈率為10倍。初步睇，只是合理區，並不能視為特別平宜。

整體上，這股都質素算是中等，如果不太大注，都有長線投資價值，但就要預佢中短期會較弱。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15085：

老師，你覺得大眾銀行626, 可買作長線收息？

見他的市盈，及市脹率都偏低，但收息7厘

龔成老師：

大眾金融控股（0626）規模細，同時業務風險會比一般的銀行略高，我先簡單講佢的業務分類：

（1）零售及商業銀行和借貸業務：主要包括提供存款戶口服務、樓宇按揭和消費信貸、租購及租賃、提供融資予有牌照公共車輛。

（2）財富管理服務、股票經紀及證券管理業務：包括債務及股本證券投資管理、證券買賣及收取佣金收入

（3）其他業務：包括的士買賣和租賃及投資物業的租賃。

業務都穩定的，但市值是大銀行的10份之1以下，規模細，同時業務類別比傳統銀行，會偏向較高風險類。

整體上，這股收息可以，因為股息率吸引，可長線投資。但不建議太過大注投資，始終本質有風險。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15086：

我想問為何澳門幣、港幣、美金，多年來仍能繼續掛勾？ 三地經濟體差別很大，經過多年供求應該愈差愈大，應該不能單靠金管局就能維持匯率。

龔成老師：

因為美元是全球貨幣的核心，無論經濟上是否有好大的聯擊，在全球的貨幣制度體系，都會同美元直接或間接掛勾，這是一個保持匯率穩定的方法。

全球都會相信美元，但未必信其他貨幣，就算歐羅，信任度都遠不及美元，加上美元是多國的貨幣儲備，所以從基本的貨幣信心及結構來講，與美元掛勾是基本。

至於具體的運作，以港幣來說，如果銀行要發行一張港幣，就要有對等的美元，才可以發行得到，你可以上金管局的網，有詳細講整個發行過程的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15087：

龔老師你好!想請教一下，美团及阿里巴巴这2股票多了個符號，這個改動會有含意嗎？

"SW"同"W"？？

龔成老師：

小米集團W（1810）及阿里巴巴SW（1830）都是特別類型的股票，所以多了一些代號以供投資者明白。

「W」即是同股不同權，即是大股東持有的1股，與一般小股東持有的1股，投票權是不一樣的。大股東的投票權是小股東的10倍。

這的確是一個不公平的制度，因此在投資時，會在估值裡減少少，以反映當中的風險。

至於「SW」，即是阿里巴巴除了行同股不同權外，這股在香港是「第二市場」上市，因為佢在美國第一市場上市的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15088：

老師， 其實你經常說潛力股風險比較大，是否由於：1.因股價波動影響買家情緒 從而令買家做出非理性行為 2. 公司內在價值要在一段比較長的時間才能反映在股價上 所以對年老者而言可能「等吾切」3. 行業前景和公司發展有不確定性

龔成老師：

潛力股的風險比較高，有兩大原因。

第一，潛力企業發展的業務，往往是較高增長的類別，這反映行業皓結權未完整，這刻可以是王者，但過2年可以不是。

這是一個有危有機的局面，正正造就了潛力股，但同時對企業存有較大的不確定性。

同時，企業見到這是一個很好的發展時機，因此投入了一定的資金，但這不一定有回報，這同樣會令企業的風險較高。

第二，市場對潛力股的期望會較大，同時由於潛力企業的財務數據變化大，令估值難，這就好易令投資者在貴的時期買入，股價上落大，風險高。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15089：

老師 見你有提到0012現在是合理價位
請問你點睇3333恆大？

想兩者選1作為收息
或者兩者一起購買均可

龔成 24000以下，平宜，用現金掃，如果再跌，可能21000，借錢 - 請問呢個指的是買恆指嗎？

龔成老師：

恆大（3333）業務本質不差的，之前的業務增長理性，不過，中國經濟轉弱，加上這企業負債極高，都增加了投資這股的風險。

恆基（0012）可以安心投資，恆大則只能小注投資。

另外24000、以下是平宜區，但記住，無人知到唔到，現時大市在合理區，最好的方法就是分注投資，同時留現金，這是最平衡的。

如果到了20000，可惜錢，到時要睇那些股跌得最多，投資值博率最高。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15090：

龔 Sir, 我有兩份以美元為單位的基金相連保險，期間都有轉換過不同基金，但大部分時間現金額總是低於投資額。現時基金大部分係投資於中國、東南亞的。保單資料如下：

保單一：2006年開始投資，現時退保金額，約USD 41k，投資總額約USD 44k
保單二：2011年開始投資，現時退保金額，約USD46k，投資總額約 USD48k

問題如下：
1. 想保留美元，作為投資組合嘅部份，應該嗎？
2. 以美元為單位，可有什麼投資工具？
3. 要等佢返到投資金額水平先斷單？

已花了10年以上時間，但係成績強差人意
請指教

龔成老師：

1）你可以將這些產品，視為財富組合的一充分，因為我地進行理財，攻守兼備是需要的，但你預這部分的增長力不會強。因此，都可以保留。

2）你可以考慮美國股票的指數基金，例如追蹤標普五百指數，又或類似的基金，我相信回報會更好。

3）你可以等佢上翻先，因為差額不算多，相信有機會做到。

你最好只當這些產品是財富其中一部分，唔好有太大期望，自己要將部分資金，利用其他方法去進行增值。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15091：

老師，以下文章點睇：
「美國等國家將香港及中國大陸列為一個危險的疫區，所有中國航班停飛美國及好多西方國家。

港幣將會大跌，早幾日港幣兌美元場外大宗交易已經去到9:1。嚟緊港幣和人民幣將會停止交易，香港交易所、上海交易所、深圳交易所，好快將會休市。

南中國海將會發生戰爭。

請您盡快安排您的股票，保全財產。

以上係我近期聽到的消息及分享俾我朋友。

我唔係預言家，但以上事情會係今年年中之前發生。

今年，除咗黃金大漲，其他資產價格都會大跌。

你今日唔信，當我痴人說夢，刪左佢，當我冇講過就好了。

局勢只會越來越差。」

我一直都覺得你講得好啱，要睇價值，唔好睇格價呢個諗法，所以收到一啲長輩呢段文章，想同你分享下

龔成老師：

香港有聯匯，根本唔會出現大跌情況。
另外，完全睇唔到股市有可能停止。
另外，完全睇唔到會南中國海將會發生戰爭。

如果上述的不利消息出現，作為價值投資者，是改變一生難得的掃貨時機，絕對是好時機！超級好機會！

我見你都有理性睇這些訊息，這是投資者好重要的！

成功投資者，就是理性分析所有資訊，然後把握機會。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15092：

龔Sir,你好！本人31歲，月入57k，目前有現金85萬，留作大跌市入貨或上車首期，每月可儲5萬。

以下是我目前的股票投資組合，懇請提供一下意見：2、12、405、460、778、2388、3988。非常感謝

龔成老師：

你現時的持有，大致都是有質素的。

要留意，四環醫藥（0460）這股，2015年、2016年，曾經出現了核數師有「保留意見」的情況，反映盤數有問題，小心這股。

另外，銀行股的比例要控制翻，不能過多。

如果你有買樓的可能，建議你現時持有的現金，繼續持現金先，另外，要計算一下自己想買的目標物業，大約要多少資金，如果現金已足夠支付首期的話，可以好好利用現時每月儲到的$5萬。

可以將其中的$2萬，用作月供股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$10000
。

你可以考慮盈富（2800）$5000。

另外再加3隻（每隻$3000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$20000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15093：

龔sir 請問：
1）最近市況低迷，如何判斷何時放售那些吾ok的股票？應該立刻放雖然蝕多ｄ但更快投入2800,還是待之後市況回升才售？

2）如果樓市中短期會跌，會否2年內便會需要動用資金作首期？

如果股市也持續低迷，現時還應該每月投入一萬在月供股票嗎？會否在要買樓時不能及時套現？

龔成老師：

1）記住，唔好用股價短期表現，大市情況，去判斷股票質素。買股票就是買企業，企業的業務質素、前景，是最重要的因素。

你賣出那些股，不是睇股價與賺蝕，是睇「質素」。

2）我相信香港經濟會轉弱，樓市中短期會向下，但不會跌得多，始終香港樓供不應求的情況嚴重。

所以，如果你打算中短期買物業，要預留多少少現金。我地月供股票、投資股票，都會以長期進行，因此，盡可能是買樓以外的資金，最多只能小部分投資股市。

因為無人知你買樓的一刻，股市的情況如何。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15094：

Hi龔sir
報了你股票班，遲啲見！

小弟22歲，月入17000，儲到8000左右。黎緊份工有補水，預計去到22000，可以儲到11-12k。諗住番多份pt，每個月多6-7k，但就要讀一個約20k既course先做到。但考慮到呢排跌市係入市好時機，我應唔應該儲起呢筆錢，等機會入市？

另外呢個月開始月供，組合如下
領展 $1000
盈富 $1000
中銀香港 $1000
比亞迪股份 $2000

請問組合ok嗎？

龔成老師：

所以有野，都從長遠的角度去想。

如果這個課程，對你將來的發展有利，就要讀，因為這個正面影響，是長遠性的，投資在自己身上的知識，永遠好過投資在股市。

我相信，你這刻的資金不多，就算大跌市，最終的財富回報未算多，這是正常的，但你要想長遠，只要你好好投資自己，集中長遠，相信30歲前有$150萬以上是有可能，你要想一些大的，長遠的，這刻好好增值自己。

你保持月供股票，同時在這年齡，努力將資金投資在自己身上。

因此，我會建議你報這課程，只要對你長遠有利就得。

同時，你報股票班都是正確的決定，因為對你長遠財富增長好有利，遲D見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15095：

你好 龔成老師
我28歲 美容行業 月入3萬左右
以前我系月光族 錯過咗好多時間
之前拍拖男朋友經常同我分享你嘅理念
我由上年起慢慢實行 令我2018終於儲到13萬 多謝你..

最近 拍拖2.5年 男朋友同我分手 認為我28歲太老 轉愛上18歲小妹妹（佢25歲）
令我好沮喪 搵唔到自己嘅價值嫌棄自己
我呢幾日一直睇你啲片 成日聽到你分享讀者來信 話：28歲 仲系好後生 .. 令我感覺好番啲..
多謝你 不知不覺默默支持住我

正題
老師 呢幾日受到你影片鼓勵
我決定要 36歲前做到財務自由 31歲前擁有首個個人物業 請問如何做到

我月入2.6-3萬（最近生意不景氣 人工有d浮動）
同家人住公屋 每月必需開支8千左右
每月 儲蓄12000-15000（包括月供在內）

月供緊比亞迪 $2000
3月起會加入 月供盈富 $4000 及 港鐵 $3000 .. 請問呢個組合可以嗎？

現在持有
盈富及匯豐各1手，恆生2手，3988中國銀行 10000股.. 現金9萬（打算恆指跌穿25,000之後 分注買入優質股 請問有推介嗎? 我心水 1177跌穿10後入1手）

請問老師對我呢個模式有沒有其他建議？
按住呢個模式嘅話請問幾多年之後可以達到財務自由？

再次感謝老師閱讀長文
感謝老師在黑暗傷心日子默默支持
當初認識你係因為男朋友10分認同你.. 現在已經人面全非了 十分諷刺

龔成老師：

好多野，我地改變唔好，唔好因為看不到你的優點，而令到你自己否定自己，你一定有自己的價值，只是別人不懂珍惜，這點十分重要！

28歲，仍是好年輕的時期，在這時期可以及早睇清楚你前男友，反而更好，相信自己，你會有更好的。

至於你的財務情況，月供部分無問題，這是適合長線的，你只要保持進行就得。至於持股方面，都是有質素的，可長線。

你現金部分，可以在大市跌少少的情況下，先動用3成，餘下再留現金，等再大的跌市才出手，你可以考慮：盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

如果你要在10年內財務自由，除了保持月供外，仍要增長知識，因為你要學懂分析企業、投資時機、平貴，先可以有更大的回報。

最後，過去的已經過去，唔好比過去的人和事，影響左你將來，記住，28歲好年輕，將來絕對有更好的等緊你！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15096：

老師你好，最近要注意身體
有幾個問題想問問：
中生制藥同金沙，幾多錢先算便宜？

龔成老師：

中生製藥（1177）是有質素，有潛力的股，由於市場都見到佢的質素，因此在估值裡，經常都唔平，你預$10以上是略貴的水平，如果要去到平，相信要$6、$7以下。

至於金沙（1928），你預$30以下先開始進入平宜區。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15097：

成哥，你好，請問用現金流折現率方法(已經計好公司價值)。

1)計好公司價值，你會唔會比多5%至比少5%來做計好公司總價值範圍。（這問題，來當做範圍方便自己黎睇或用這方法平衡下假設自己計錯）

2)你教我計好公司總價值之后除公司已發行股份，就會知這股合理價幾多，下一步就是比較現價，（若計好每股幾多）假設係$10，現價$20。。

甘果10$是合理價，甘10蚊跌幾多先叫平宜，10蚊升幾多叫合理中上，或貴，學生不明每股的意思。要唔要再計10$的範圍?。。只明白成哥教我（若公司總值20蚊，現市價10蚊，長遠計10蚊會慢向20蚊）

龔成老師：

1）這個沒有絕對的範圍，如果是巴菲特，佢會運用一個叫安全邊際，即是計出一點範圍後，要一半以下，先算平宜區。

2）由於現金流折現法，計出的是一點，我地可以用一個上下加%的模式，去定義平貴。例如30%，作為一個區（這個無絕對）（具體會在進階班講），但原理就是希望，將過往股價分區，合理、平、貴。

股價在中短期，可以與價值無關，但長遠來說，一定會趨向價值，因此，若果是計算價值正確（這是大前題），你在平宜區買到，之後股價會慢慢上翻合理價位的。

計算估值要多練習的，同時，現金流折現法比較深，初學時唔好只依靠這方法去投資。最好同時同多種方法估值，會更立體。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15098：

老師你好，本人每年約投放30萬在股票市場，
現持貨大約5萬股中華煤氣

但因應現在零售業和經濟低迷，
未來應該繼續買煤氣還是趁低買入希慎、恒地這類公司，謝謝回覆

龔成老師：

煤氣（0003）本身有質素的，我一般建議長線持有，唔太建議轉來轉去。

從投資值博率的角度，希慎（0014）正受中短期不利情況影響，對長線投資者來說，這刻的確較吸引。如果你持有煤氣的比例，佔財富組合較多，你可以減部分，將資金投資在這刻值博率較高的企業。

恆基（0012）都不差的，但這刻的希慎會較有值博率。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15099：

成哥你好，我今年25歲月入25K。2019年尾問家人借首期買左新界私樓420萬250呎放緊租一萬/月，想利用層樓轉按加按投資目標係兩層。望住依家個市好似不斷跌，有無咩意見可以俾到我？

龔成老師：

你的方向是可以的，但唔建議你太心急進行這事。

首先，你首期問家人借，如果你填寫個人的資產負債表（《財務自由行》有教），你會見到你的負債比率好高，當然，你年輕，可以承受風險。但如果你再增持物業，而模式是利用加按進行，其實會令你負債進一步增加，風險高。

另外，你要以長遠作計劃，如果你2019年買完樓，在這麼近的時間，又再買一層，就會令你買入時期集中在同一經濟週期，這會令你的風險增加。

樓市中短期上落好正常，反而更重要的，是你的長期配置模式。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15100：

你好 成哥
我岩岩畢業冇耐 做得3個月野 每個月(16k) 又資產唔多(~40k) 又要個個月還學債(1.8k), 可以點投資?

暫時組合(股數)
00097 恆基發展 3000
00823 領展 100
00987 中國再生能源 2000
01222 宏安集團 20000
01310 香港寛頻 500
01373 國際家居零售 2000
01929 周大福 400
02888 渣打集團 50
03988 中國銀行 1000
06882 東瀛遊 2000
08265 中國之信 12000

同埋諗住今個月開始慢慢月供港股同美股 ($/月)
長和 500
電能實業 500
新世界發展 500
恆隆地產 1000
香港交易所 500
AIA 500
港燈 1000
盈富 1000
香港電訊 1000
disney, apple, adobe, amd, brk B, JNJ, google, QQQ, FINX. VT,XBI 各100USD/month

會唔會太過分散同太多?我覺得自己供得辛苦。。。。

我跟證劵行供 咁岩免月供計劃佣金 港股500起跳 美股100美金起跳

拜託大師指點一二
個個股都想買 又唔知點揀好
想30歲之前有100萬
仲要每年供緊11k既儲蓄人壽加危疾保險

龔成老師：

以你現時的財富規模，5-10隻股票是較適合的，你現時組合開始有點散，你最好集中翻少少。你應該分析每一間企業的質素、前景，以評估最有投資價值的股票。

月供方面，亦有類似的情況。

你上述所選股的，很多都是有質素，但你都要學懂，那些質素較好，長遠發展較佳，無論你現時是資金多，還是資金少，你都要學懂處理這個問題。

買股票就是買企業，你要仔細睇企業的業務、財務數據、產品、企業估值、現時平貴。買入後，要持續跟進企業的業務發展（不是跟股價）。

如果你想在30歲前有$100萬，首先有大量增加投資知識，同時努力儲蓄、投資，這才可以做到（但我相信你可以做到！）

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。