【大陸住Hostel落荒而逃奇遇記】
話說小弟除夕果晚喺長春，諗住住Hostel，唔好一條友倒數咁冇癮丫，而我搵過當地，好似唔係好興酒吧文化，想搵間酒吧去倒數都有難度。
大家都知小弟住hostel接受能力極高，如果無啦啦有個肥佬喺我旁邊飲醉酒裸跳，我都應該訓得著，最多fuck佢幾句，最緊要平。想當年澳洲十蚊澳紙晚伏到入肉，夠平我就住咗一星期。
當然，都試過搞到要轉場，尤其Sydney。
我成日話，全世界最差Hostel第一係澳洲，第二係美國，最好Hostel第一係日本，第二係大陸，今年俾南美爬頭。冇呃你，住過幾間如青島、北京、杭州等等都好鍾意。咁話曬諗住有班人倒數，冇理由一個人住「標間」睇電視架。
之但係，長春喺Hostelworld係搵唔到有Hostel。唔緊要，booking.com有、攜程有咪得囉，結果搵咗呢間第一位嘅。
跟漠河三日團Last day親歷淘寶Comment點嚟，廢柴司機拎曬大家電話自己讚自己，我當然唔肯俾。上網睇話好近地鐵站，你老味又上又落又過地盤，仲要小弟百年一遇拖喼，就係雪地行，已經拖到忟（之前酒店仲要送咗包2.5kg東北大米俾我），嘩行到樓下真係不得了，咩地方嚟架？！好似一個荒廢住宅區咁，仲要飄住細雪，會唔會有喪屍架？
入到間嘢，連招牌都冇，分明係Airbnb，違法果隻，老板同老板娘幫我Check-in，全程打緊機，望都唔望你，超冇禮貌。間屋亂到垃圾崗咁，成陣味，又要陰陰暗暗，我已覺瀨嘢。
如果東北室內標準暖氣係27-30度，呢度最少35度，我好似焗緊桑拿咁。
叫得自己青旅，但冇一個係「青」，兩個大叔圍埋煲煙，一個訓緊，睇啲衫多成咁，應該全部都係Hostel總有一兩個唔知做乜嘅長期住客。我熱到頂唔順，落街買枝凍水飲——呢度冇常溫，只要放街邊就係凍水，漠河係食冰。
上到去先好笑，老板問圖中呢位紋身大叔：「你在抽煙嗎？」
紋身大叔：「你他媽的哪裡看到我抽煙？」
老板：「我就是嗅到。」
紋身大叔：「你你你嗅到“撚撚撚撚”（能）當真嗎？你臭傻B！」
老板：「注意你說話。」
紋身大叔：「你不給是這小子嗎？」
（吓，我房門都未入喎）
老板：「給我發現你抽煙，我可以趕你走！」
紋身大叔：「哦，你牛B喇，報公安呀！我怕你呀？噢，你回來喇？」
我後面唔知幾時企咗個大媽喺度，喂呢個中年旅舍嚟！
老板：「你試試看。」
紋身大叔：「我就是不走！」
嘩屌。我想要嘅係南美Hostel種歡樂呀，我唔要同大叔大媽喺粗口聲中度過呀！
你唔走，我走！
房費唔洗退（兩晚先100蚊港紙），豪俾你，拿拿臨搵間漢庭，一晚貴幾十蚊，情願一個孤單快樂。
我落酒吧去商場Show倒數，都唔想35度熱辣辣對住紋身大叔！
不過，即使我轉咗場，呢個地方都係唔興倒數嘅。話說我間房對到正長春火車站，睇住佢個大鐘夜晚十點就熄燈；係就係俾我搵到有商場Show，但唔好諗住好似時代廣場咁大型，即使個商場係萬達，竟然得個舞台仔，有幾個唔識嘅大媽喺度唱歌，在場都叫做有幾個人路過望吓個「倒數Show」嘅。
想當年曾經喺重慶倒數過，雖然唔似香港或者西方國家咁好氣氛，但估唔到呢啲二線城市可以靜局到咁，我問咗好多人，都冇人知道邊度有得倒數，甚至，根本醒唔起果日係12月31號。大概，呢種倒數文化唔係度度有。
我都係，返返酒店睇電視倒數算吧啦。
【原創小說】
香港正式上架，各大書局均有代售，海外讀者亦可於網上書店購買，詳情請看：goo.gl/3g4Hk8
－
【自製南美明信片】
正式開售，購買全套可以向你寫點心意：goo.gl/Dfmpbc
－
【IG請follow】www.instagram.com/travelerwithmovie
南丫島airbnb 在 港式情侶HKstyleCouple - Facebook 的推薦與評價
南丫島 ：Funky Pad & Amazing Views in the heart of Lamma 呢間南丫島Villa樓高兩層，設有巨型天台可以睇到「海上日落」，而天台位置亦好貼心咁準備咗lounge bed， ... ... <看更多>