電影《春嬌救志明》票房節節上升，香港上畫兩日累積票房超過360萬港元，在內地昨日開畫票房突破4615萬元人民幣，可喜可賀。就連昨晚（28日）在廣州舉行「突然想起余春嬌唱游會」的楊千嬅，得知票房成績一飛衝天，開心到與嘉賓梁漢文（Edmond）合唱時4度喪笑嗌停，搞到Edmond一度懷疑自己上了整蠱節目。同場千嬅見證男Fans即場向女友求婚成功，非常感動。
昨晚「突然想起余春嬌唱游會」，千嬅化身余春嬌獻唱多首電影系列出現過的經典歌，《最後的玫瑰》、《當我想起你》、《動地驚天愛戀過》和《突然好想你》等，更與電影中余春嬌的好姊妹「Brenda」林兆霞和「腿張開」陳逸寧組成MKB48 又唱又跳《傳說》，陳逸寧自爆參考大媽廣場舞，難怪全煬high爆！
特別嘉賓梁漢文（Edmond）與千嬅合唱時就笑料百出，話說Edmond與千嬅合唱吵架歌《滾》，他叫千嬅一齊培養情緒，音樂準備響起，千嬅突然說：「其實我哋真係幾勁……」Edmond被擾亂情緒，千嬅即道歉轉個臉向觀眾說：「人哋唱情歌唱到開巷，我哋鬧交鬧到開巷，係咪勁先？！」觀眾起哄大笑，情緒平伏後再唱，千嬅卻唱錯另一段歌詞，耍冧重唱。Edmond大方地說：「咁我可以再投入過嘅！」樂手們又再準備起歌，點知千嬅似被篤中笑穴，笑到標晒眼水。Edmond忍住笑，說：「我可以再再嚟過，使唔使畀個sportlight呀？」他刻意拉開話題希望千嬅盡快平伏笑意，但她卻笑到踎在地上，Edmond無奈地對觀眾說：「你哋唔好再引佢笑，佢就嚟賴尿架啦！」
音樂又再響起，千嬅又叫停，她說：「到我未得呀！」Edmond反白眼：「其實係咪整蠱節目？你哋夾埋整蠱我？」千嬅邊笑邊解釋：「好似好尷尬，明明大家太開心……（你想大家點幫你投入返個情緒呢？）頭先講到好開心，突然要咁『行』去嗌交，我要冷靜吓先！（大家都幫緊你！）你唔好叫全場一齊嚟鬧我呀！」結果順利完成合唱。之後Edmond獨唱《七友》和新歌《終身贊助》，全場揮動螢光棒大合唱。
事後千嬅向Edmond道歉：「剛才我喺耳機聽唔清楚，然後又唱錯另一段喎，搞到你一路都唱唔到……死啦，觀眾會唔會以為係你甩咀架？」Edmond無佢咁好氣：「唔會囉！」千嬅聞言又喪笑。
電影票房報捷，音樂會亦喜上加喜，有男Fans以千嬅的歌曲向女友求婚，他拿出戒指單膝跪在台上說：「今日喺你我偶像楊千嬅面前向你許下承諾，希望與你愛在旁若無人的太空。你願意打救我，做我嘅余春嬌嗎？」女友感動答應：「我願意！」千嬅起哄「親一個」，二人甜蜜Kiss，合照後她笑說：「我輩份高咗喎！」並祝福二人白頭到老，永結同心！
#楊千嬅 #梁漢文 #突然想起余春嬌唱遊會
#非凡娛樂 #非凡香港
