根據 健吾 姐姐的「講政治會跌like」定律，我係唔應該講政治；又，根據「人妻先生每次俾人鋤得最甘嘅都係因為講泛民」定理，我係唔應該講泛民。
但可惜人妻先生從來唔怕跌like亦唔怕嘈交，正所謂「有心唔怕遲，初七都係赤口時」，只要有心，日日都可以係赤口，所以，我開動啦！
老實講，呢條片做得好差。
差在字眼用得唔準確、演繹得唔準確。首先，你要踢爆鄭泳舜 Vincent Cheng係社企「家園」的高層無問題，但你睇下家園係做咩架先？無錯，係一間近乎用成本價賣野俾街坊的超市，然後係質疑呢間超市收集大量個人資料、同建制派過從甚密云云。
你點可能用「以近乎成本格益街坊」黎形容你的政敵？係都話「以本傷人」、「迫死小店」、「長遠蠶食社區自給自足能力」、「擾亂市場經濟」... 你不如條片紀錄埋民建聯平時送呢樣嗰樣「樂善好施」？！你踩佢定讚佢呀依家？
如果用「以本傷人、迫死小店」，可能仲可以激起街坊的同情心，但話佢收集個人資料唔知拎黎做咩，呢個對於基層市民黎講真係有幾多意義？你信唔信喺香港擺個檔，叫人俾張身分證我影印，我俾800蚊再加堆柴米油鹽你，一定排晒隊？對基層市民來說，最唔值錢就係私隱，佢地係咁介意就唔會幫襯「益街坊」的家園啦，對幾多基層黎講，你公開佢係「家園」高層身分，佢地還票報恩都黎唔切啊，你都識講啦，「益街坊」呀！雞脾打人牙骹軟，佢成間超市打到你甩骹呀，俾我我唔講啦！
另外，講佢辦公室係呀爸俾嘅，背後有幾多財團支持... 我以為睇緊鄭泳舜本人的宣傳影片呀！對幾多人黎講，有父蔭有靠山係一件好事？佢資源多自然做到嘅嘢就更多，辦公室都係自己嘅，保證唔怕俾領匯加租加到要走佬，對市民黎講，百利而無一害。等陣先，點會真係咁，政商勾結點會有好野？條宣傳片點解唔講兩黨商勾結，歷年來做左啲咩衰野？
結果？結果睇完條片，我以為雷鋒返生，建制派出左一個樂善好施、家境和睦、長袖善舞、政商通吃的超級富二代，要不是我咁憎建制，我睇完都會覺得：「其實選佢都唔錯喎...」話一個男人「除了有錢以外一無是處」同鬧交時話個女人「你除左靚之外，仲有咩優點？」係一樣唔具有殺傷力架！唔信？你即刻咁同你女友咁講，睇下你女友會唔會嬲？
#條片葉劉做策劃架
#淨係得葡萄味
#重要係官商勾結
#要突出勾結會產生的惡果
#大佬唔好講到佢成個韓劇男主角咁
#後生有錢有父蔭仲有自己事業
#想點呀
#來自掃把星的你
#我係佢就承諾由今日起每天頭311個客黎家園買野七折
#成功爭取
#我試左咁樣話我老公
#佢開心到癲左
初七小姐姐資料 在 初七 的推薦與評價
初七. 7574 likes · 1 talking about this. Personal blog. ... 初七. 7.5K likes. . 16K followers. @seventhdaylady. . Follow · . Posts. ... <看更多>