「海之戀」都要行埋一邊。
#全部GoogleMap都搵到 有政協話為咗令民心歸附，首先要減少殖民符號，仲話要由地名同路名開始。於是個個都喺度諗「習大大道中」、「維尼大道東」，呢啲名係霸氣，係出色嘅，但如果你試吓Google Map吓大陸啲地名樓盤名，你就知，你可能低估大陸人改名嘅尺度。呢度輕輕歸納出中國六大改名玩法。
世界之窗式玩法
即係咁，香港樓盤名，好鍾意用外國地名命名，顯現專貴氣派，好似周六加推嘅日出康城Malibu，其實原本就係洛杉磯頂級富豪區個名。不過香港呢種抄外國地名嘅玩法，中國早已超越，你試下Google Map「#白金漢宮」，你會見到除咗英國有個真白金漢宮外，喺深圳都有個呢！如果你係曼城嘅Fans，冇時間去英國潮聖唔緊要呀！深圳都有個，叫「#慢城」，英文叫「Slow Town」。
船堅炮利式玩法
想地址霸氣到嚇死人？航空母艦夠嚇未！長沙就有個「#航空母艦小區」（Hangkongmujian Unit），住入去就一定可以做返個艦長啦。「司機，唔該我想去航空母艦！」司機唔趕你落車當你贏。至於烏魯木齊雖然冇航空母艦，但有個「#一炮成功小區」，呢度嘅住客，如果喺一個唔適當嘅場合，有異性問起你住邊，而你又答，嗯…希望對方唔好誤會。
肚餓式玩法
甜品唔一定係食，仲可以住！喺大興就有個樓盤叫「#金科果凍」，而瀋陽就有個「#巧克力城」，希望佢啲樓價，唔使好似啫喱、朱古力咁要放雪櫃。廣州有個盤都出色，叫「#奶茶咖啡」，Sorry，可以走甜嗎？
夢幻式玩法
童話故事係浪漫嘅，但浪漫到好似上海有個小區叫「#白雪公主」，咁請問入面嘅保安係咪要扮小矮人定惡毒母后，會全天候供應毒果嗎？行過少少去睇睇天津，就破咗企鵝只係喺南極嘅常識，當地有個盤叫「#企鵝先生的別墅」，企鵝都住別墅，香港人呢？劏房咋！
思考人生式玩法
正所謂色即是空、空即是色。揚州就有個盤大玩活佛Viva，成個樓盤項目叫「#阿彌陀佛家園」，返到屋企，唸住大悲咒、敲吓木魚，真係寫意呢，至於信耶穌嘅呢，麻煩自己迴避啦。唔信佛教，信道教嘅都幫到你，西安有個「#三豐中心思想小區」，入得去，都應該係武當派嘅弟子（應該係…）
晒冷式改名
講到最晒冷，以下呢個暫時係我搵到最直接嘅樓盤名，一個喺蘇州嘅盤叫「#萬科碧桂園」，開發商冇錯，正正就係萬科（2202）同碧桂園（2007）！「你住邊呀？」「我住萬科碧桂園」。
by千頌C@堆填區
http://fb.com/winbigwok
