［巴爾幹奇趣錄］（＊）寫波少人睇，但不寫不快。羅馬尼亞甲組聯賽，克魯日Cluj（＊＊）
1. 看點係乜？有位球員，23秒就畀人換咗出場！仲要係冇傷冇病冇乜事的。波都未掂過就畀人換走咗
2. 其實球員一落場就食紅牌耐唔耐都有，最出名當然係玻利維亞名將，（http://bit.ly/2Q6IiM5），「魔鬼」艾茲華利（＊＊＊）。甚至有球員未換入嚟已經紅牌出場。不過冇病冇痛，23秒換走，都好似乜見。
3. 係咪教練哈碌出錯人？又唔係添喎。精心部署的。
4. 一切都係規矩作怪，咁上有對策，下有政策。
5. 原來羅馬尼亞規定，為咗「本土優先」，畀年青人上位，每隊波都要至少出兩個21歲以下嘅土炮球員。
6. 咁以往啲球隊，有時咪十五分鐘，或者三十分鐘換走條友咯。但好似今次咁，23秒，就未試過。就係第一個界外球就換走！
7. 留意係Cluj開波先的，冇自己一腳踢出界已經十分畀面。
8. 賽後啲評語，你大約都估到了。其他隊就少不免批評幾句，不過其實大家都咁玩，都冇乜好鬧人，只係估唔到沒有最盡最有更盡。對手咪話：冇嘢嘅，又唔係犯規，球會贏波要緊嘛，不過食相就好難睇咯。
9. 咁Cluj嘅教練都好坦白：我都覺得好核突架，但冇計啦，搵食嘛。唔好怪我，怪個制度啦。
10. 值得講下，Cluj嘅教練，正係相當有名氣嘅佊德斯古。車路士嗰位，羅馬尼亞名將。
11. 我就覺得，合理嘅。佊德斯古已經好得體好客氣咁回應。事實係咁喎，又唔係犯規，怪你個制度戇居啦。佢又冇好得戚咁出嚟攞威。況且，都唔係話串到一開波踢個波出界（戴志偉定小志強？）。事實球隊都少咗個換人名額丫。對手鍾意亦都以咁玩。
12. 又，羅馬尼亞真係好地方，埃汾去過近百個國家，羅馬尼亞one of the best ．最主要可以睇熊！山上面嘅熊，唔係動物園。其實成個巴爾幹半島都好值得去。最冇嘢睇反而就係科索沃。
（＊） 聞說羅馬尼亞人好鍾意強調自己唔係巴爾幹。因為巴爾幹就係粗魯，打交。咁即係先富起嚟嘅克羅地亞都話自己唔係巴爾幹。但仲有樣嘢好唔同：羅馬尼亞人的確同隔離嗰堆友唔係好同。羅馬尼亞係拉丁人，意法西葡同種，而其他成堆都係斯拉夫人，俄撚捷克烏克蘭嗰啲，克羅地亞都係，唔好有錢咗就忘本。正如語言都完全唔同種，羅馬尼亞語係拉丁語系，其他係斯拉夫語係。我唔會話邊種文明啲，但真係唔係同種。
（＊＊）因為歷史原因，呢個地方，德文名叫做Klausenburg，同英文（羅文）完全唔同。仲有其他羅馬尼亞地方都係咁。例如我去過嘅Sibiu（中文叫乜？屎標？但個地方真係標屎咁靚），德文係Hermannstadt，靴文之城，連隊波都係用呢個名。仲有另一名城Brasov（又係去過，有熊睇！），德文叫Kronstadt。
（＊＊＊）呢位仁兄堅係經撚典。你知啦，我地當年冇得上網又冇維基，都係聽講波佬講。咁講波佬都係聽人講。總之此人呢，當年幾有名氣，講到秘密武器咁。巴西史上第一次外圍賽輸波，就係對玻利維亞。輸波元兇兩個，第一個係高原，第二個唔係竇唯（SORRY FOR咁爛），正係此人入波。玻利維亞半世紀第一次入世界盃決賽周。咁世界盃揭幕戰對德國，此人先列後備，亦係陣中最有名氣球員。後備入替前熱身仲好似你打Winning 啲公仔咁跳跳扎扎，「我入嚟實搞掂你班友，睇阿叔表演啦，巴西我都唔驚呀」，點知出到嚟，四分鐘就直接紅牌出場—更加正嘅係，之後停賽兩場。玻利維亞當然係出局，佢嘅世界盃之旅就係得呢四分鐘。但我地講足幾十年。
可以睇片，「反正都係幾十秒啫」：http://bit.ly/336tPoS
克羅地亞英文 在 克罗地亚- 维基百科，自由的百科全书 的相關結果
克羅地亞 共和國（克羅埃西亞語：Republika Hrvatska），通稱克羅地亞（克羅埃西亞語：Hrvatska，音译赫尔瓦茨卡），是一個位於中歐、地中海和巴爾幹半島交會處的單一 ... ... <看更多>