有日媽媽帶住個女嚟睇醫生～
睇醫生做埋快速測試確診咗係流感，我出藥俾佢哋時…
媽媽拎住啲藥問：「食咗係咪就OK㗎啦」
我：「呢枝要食晒嘅，如果之後再冇燒冇痛嘅話就可以唔食退燒止痛呢枝，同埋最緊要多啲休息，呢張係醫生寫俾佢嘅病假紙」
媽媽推返張病假紙俾我：「唔駛呀，佢聽日照返學呀」
我：「佢流感唔可以返㗎，會惹俾其他小朋友㗎」
媽媽：「要惹都早兩日惹晒啦」
我：「…咁小朋友都要休息㗎嘛，而且佢確診咗係流感，更加要留喺屋企休息，之前唔舒服嘅其實都唔應該返學㗎」
媽媽：「返學又唔係辛苦擔泥，淨係坐喺度啫，都係抖緊啫，OK㗎啦，呢張唔駛㗎啦，唔駛係咪平啲㗎？」
係呀？咁你以前傷風感冒又嚟拎病假紙嘅？你唔好以為我唔記得你呀，你返工係擔泥咩？
我：「你唔要病假紙都係一樣價錢，你自己唔舒服都會休息啦，小朋友唔舒服係更加需要休息㗎，如果學校知係流感嘅話都一樣唔會俾你返學㗎咋」
媽媽：「我唔出聲佢點會知呀？」
你當流感流㗎？你當老師流㗎？
第二日，媽媽打電話嚟診所：「喂？診所呀？我噚日同個女嚟睇過㗎，流感嗰個呀！我要寫張紙俾學校話我個女冇事返得學呀！我個女同MISS講咗佢有流感呀！」
你個女有前途呀！
我：「冇得寫呀，噚日都叫咗你唔好俾佢返學㗎啦」
佢：「有冇垃圾到咁呀！」
嘟。
佢CUT咗我線～你都知自己係幾咁不該呢～
