［冷氣企管系列］在這社會最怕走得太前呀。而家搞生意？隨俗而失敗，好過不隨俗而成功。
1. 又係一篇好文（https://econ.st/3g3QlF4）。亦都示範咗「量化」點解緊要（但唔係啲濕鳩問卷）。
2. TL：DR – 人做我唔做，殺出新血路。趁逆市租平又競爭細，而家去搞生意好唔好？最好唔好。輸死你呀。
3. 先講個故事。2008年夏天，有間公司，叫做AirBed & Breakfast，原理就係整張吹氣床在自己屋企，就可以屈蛇接待客人，希望執到啲訂唔到酒店嘅人。但之後就係雷曼爆煲。當時公司窮到燶，要賣早餐，用奧巴馬同麥凱恩個名去玩食字gag，但畢竟畀佢地籌到三萬蚊美金。
4. 冇錯，呢間公司就係Airbnb。當時嘅投資者認為佢地有小強打不死精神。
5. 事實上，好多大公司，都係在衰退之下創業嘅。迪士尼係大蕭條出嚟好多人知，General Motors同General Electric都係差不多。近代嘅，微軟同UBER都係大衰退時創立。
6. 除咗新公司外，好多劃時代嘅產物，都係啲公司在衰退時搞出嚟的。例如iPod誕生在2000科網爆煲，淘寶係沙士時搞出嚟的
7. 呢類故事，總有幾個，夠晒勵志，記得袋住幾個。亦都好似言之成理。順境嗰時阿豬阿狗都可以吹水扮識，逆市時就見到邊個真係有料到。況且經濟差呢，租又平啲，又可以平啲請到啲勁人，加上好多人冇心機，真係有心機嘅可以跑出。
8. 聽落幾好，可惜係假嘅。經唔起數字考驗
9. 其實唔難計，篇文睇返而家美國500最大公司，再睇下佢地創立年份，然後睇下當時係經濟擴張定衰退。結果？500大公司中，係擴張期創立嘅，遠多過係衰退時期創立。咁當然冇計到有啲中途已經死咗，或者打唔入500強嘅（＊）。一開波就逆境，好難搞架。
10. 好簡單，樓上固然可以講一大輪咩衰退時租平啲人工平啲—但正係因為你生意都難做好多嘅結果嘛，唔會無緣無故租平人工平。況且，一復蘇嗰時，租咪又係加，你啲人咪又係走。
11. 另外，擴張期有一種特徵，就係錢多人傻。可以諗下三四年前一街Start up個個當自己孫正義咁派錢，講燒錢搶市場，唔使睇盈利，最緊要顛覆。咁到衰退期當然掉轉，金主自己都自身難估，仲得閒理你檔嘢？
12. 不過，《經濟學人》呢個專欄叫做「熊彼得」咁多年（好似由我開始睇已經係），當然係相信creative destruction，創造性破壞。大衰退後總有一堆企業家出現。問題係，會係乜人？係平地一聲雷嘅小朋友？定係有足夠糧草捱過寒冬嘅初創？定係其實又係大公司？
13. 文章作者，似乎認為好難再有啲「車房」公司，幾條小朋友冇人冇物就搞間大公司出嚟。時代唔同了，乜都講錢，而家入場門檻亦高咗好多，真係第一次創業嘅，根本唔識說服投資者科水。比較可能成功嘅，係之前已經集夠資嘅公司（UBER？）。早兩年仲係錢多人傻，start up 集咗差不多6000億美金，而家就用嚟過冬了。
14. 當然亦都唔好忘記，好多時呢啲creative destruction，唔係中小型公司帶嚟，而係本身行業巨頭嘅新東西（例如iPod）．之前啲文都寫過，幾間大科企非常之咁多錢，發債成本亦極低。
15. 但到底佢地係會繼續投資R&D（呢兩個字母夠晒空泛），定係其實以本傷人，借機餓死啲對手呢？其實兩者嘅界線都未必咁清楚。畢竟創新呢個過程往往就係順手整死埋人，好難分得咁清，點會係造大個餅大家一齊？係造大個餅，不過自己食晒。你有冇見Facebook造大咗個餅分返啲畀蘋果日報TVB？
16. 潮退時見到邊個冇著泳褲？可能你會發現自己條泳褲一早畀浪沖走咗，其他人唔好意思提你啫。
（＊）當然呢度至少有兩個問題。首先，衰退嘅年份，係少過擴張嘅。所以少啲公司根本好正常。二來，衰退年份可能根本就少人創業，可能十間有一間最後變500強，但擴張年份可能係一百間有三間—咁係咪其實衰退時嘅「成功率」高啲？呢個真係要拎返啲數據睇。
------------------------------
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
企業家精神熊彼得 在 【資本主義經濟學及其社會學】 管理學之父彼得‧杜拉克 的推薦與評價
與凱因斯齊名、深受現代管理學之父杜拉克、諾貝爾經濟學獎得主海耶克推崇提倡「創新」與「企業家精神」的20世紀經濟學大師──約瑟夫‧熊彼德深入剖析 ... ... <看更多>