【有線電影台嘅集體回憶，正睇住佢由盛轉衰】
Cut有線成為全城熱話，小弟屋企晨早Cut咗，講唔返有線近兩年最新動向，但講起新聞台都真心佩服有線喺兩次社運期間嘅採訪，尤其14年果次，喺當時未到人人都可以拍片年代，睇住佢哋係主觀鏡頭咁跑，原來睇香港新聞都可以睇到戰地新聞咁緊張，當年都出過Post大讚有線新聞記者堅專業。
新聞係一件事，呢度講電影都想講返電影台嘅集體回憶，亦見證住呢個台衰落。
仍記得九十年代尾，果陣仲未有錢去租碟，更加唔好講日日入戲院，堅係電影台俾我認識到好多電影。果時分成三個電影台，當中電影2台係緊接兒童台休台後，夜晚唔知九點定十點先開台，就會播啲經典啲冷門啲文藝啲嘅戲，喺今時今日角度，呢類戲唔方有收視，但果陣佢哋會肯去播，甚至有專題回顧系列，唔駛去BC都一樣認識到大師好戲。
Popular商業片角度，有線嘅電影1台，當年每個星期都會有「周六片王電視首映」－－佢真係電視首映，喺港產片仲未衰落時，好多港產大片都係果度睇，例如一堆周星馳嘅戲、仲未「變壞」前嘅成龍賀歲片、一系列銀河影像嘅作品，小至當年曾盛極一時嘅「中大電影」－－《陰陽路》全集要多謝電影台呀🤣，都係喺電影1台睇。喺未開始入戲院、未識得租碟年代，有線電影台就有如今日嘅Netflix咁，係個電影片庫俾我擴闊眼界，當年真係會跟住佢個電影時間表，放學趕返屋企坐定定睇戲。
點知，個電影台愈搞愈謝。當年你「周六片王電視首映」講緊可能睇《食神》睇《喜劇之王》睇《孤男寡女》，點知事隔n年後佢仲不斷係咁播呢類戲，更加愈播愈殘，同一套戲隔幾日就見佢播一次。去到後期，多咗好多競爭對手，更加唔好講串流年代，有線電影台愈做愈衰，後期好似冇埋「周六片王電視首映」。喂講真「電視首映」，片目邊夠now咁快咁新？然後，做做吓都唔好講港產片，以前荷里活電影都可以好新，起碼快過「明珠930」，點知做做吓又係頹咗，俾「明珠930」搶先埋，而藝術電影同經典電影都愈做愈少。
曾幾何時，佢主力自己拍片，但講真驕陽電影嘅製作，大部份都唔係好睇，而因為係自家製作，又不斷係咁loop，就如同「無線大電影」會喺東張西望講到你煩咁，但事隔多年後，我依然唔知《雙子神偷》「後事」最終會「如何」。
最後，多咗HBO之類台，我不如睇HBO。
一個台有起總有跌，終有墮落時，冇嘢真係可以「永恆」，睇亞視就知道，可能難保他朝有日Netflix都會墮落。睇到有評論都幾唏噓，話裝有線就係為咗睇新聞刺針同有線中國組，唔通真係為咗睇個爛鬼電影台咩？
其實，曾幾何時，我真係好鍾意佢個電影台，俱往矣。
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
亞視 精選 在 亞視精選Drama Asia - YouTube 的推薦與評價
... <看更多>
相關內容