關於 亞視 唔 係 執 左 咩 ，我們在網路上蒐集到這些相關的討論、資訊與評價

大家好，唔知你仲記唔記得一個追左我四年既故事

《弊傢伙，我女朋友有咗》

上年出完實體書，今日我將正文放返上黎，比有追故既朋友睇埋個結尾佢，原諒我咁遲先放，因為我之前想保障返支持我實體書既朋友

但最近我諗通左，反正實體書有額外內容，以後我Post正文就可以，將延續既故事留返比支持既朋友

其他朋友，我都會提供一個完整故事比大家，答謝大家支持

首先！！！

應該唔記得自己睇到邊吧……

不如，我地重頭黎過！！

－－－－－－－－－－－－－－－－－－－

第一回－阿鋒

我中學阿Sir講過，有好多嘢，先後次序調轉咗，就會好事變壞事，其中一樣就係生仔，有小朋友絕對係好事，但未結婚就有小朋友……我唔敢講係好事定壞事，之不過肯定有麻煩，仲要係大麻煩。

我叫阿鋒，剛剛大學畢業，有一個拍咗唔長，亦唔算短嘅女朋友，叫阿儀，我二十四歲嗰年，喺譚仔食緊雞肉墨丸小辣走腐皮嘅時候，當我夾起第三粒墨丸嘅時候……我聽到一個改變我一生嘅消息。

「阿鋒啊……我仲未嚟……」阿儀面色唔太好咁講。

「係囉，我都就食完喇，你個米線仲未到！阿姐！！！差碗嘢！！」我催咗催阿姐，順便吹咗吹粒墨丸。

「唔係啊……我話我仲未嚟M啊……」其實呢一句講得好細聲，我亦屬於耳嗚嗰一類人，但耳仔好似怕我聽唔清，特別開行Turbo咁等我聽得清楚，直情係有震撼嘅感覺。

男人思維，通常係第一時間尋找問題，我好仔細咁諗，唔通係上次？飲咗少少酒，未戴就放咗入去幾吓，喂，幾吓咋喎，阿Sir，比次機會啦！

定係另一次紅燈嗰陣挺而走險，大哥，咁條路無車，唔通唔過咩？

咦，唔係喎……上個月安全期……

「你有冇聽我講嘢㗎？喂……喂……阿鋒……喂……」阿儀嘅聲音將我扯返現實。

「睇住啊，畜牲勿演酸柴清湯！」遲遲未上嘅米線終於到。

我望一望米線，然後用好冷靜嘅聲線同阿姐講：「其實呢……我哋就無叫酸菜，你失驚無神比個酸菜過嚟，我好難食㗎喎，同埋問題唔係我哋鍾唔鍾意食酸菜，而係我哋無叫到嘛，退一萬步就算我鍾意食，你送到上嚟，我呢個Moment唔想食，咁算點先？」

「痴孖根，幫你夾走佢啦！講咁多做乜！」阿姐懶得理我，一句一手將米線拎返走。

阿儀好深沉咁啤住我，我用第三粒墨丸將就快想嘔出嚟嘅兩粒墨丸壓住，然後好平靜咁講：「不如我哋去驗下啦，唔好估估下，有就有，無就無。」

離開譚仔，我行入轉角嘅萬寧，拎起二十八個九嘅驗孕棒，好記得收銀姐姐淡然問：「有冇積分咭。」「無。」「比八達通？」「係。」「要唔要膠袋？」「唔駛。」「多謝支持環保。」

支持環保？無錯……之前我就係為地球出咗一分力，支持環保，所以依家要嚟消費，可以比我揀多次嘅話，我發誓會戴返個套，慳返支驗孕棒，兩害取其輕，前者明顯再環保少少。

喺海港城嘅廁所外面等嘅時候，我打咗比我一個死黨兼好友－肥仔。

「鋒哥？好日唔搵我？你轉行做保險啊？我爛命一條，唔需要喎！」肥仔劈頭一句就將我沉重情緒拉開，證明我打比佢係無錯嘅……

「有樣嘢我唔知同邊個講好，但係我想搵人傾訴，我條女遲咗嚟……」人生中有好多事唔知點開口，而呢樣係其中一樣。

「OMG！Happy Father’s Day！Happy Father to you, Happy Father to you, Happy Father to you, Happy Father to you！」呢一刻，我有種自己係亞視嘅感覺，即係點？即係死咗佢好過囉！

「其實呢……我打嚟想你安慰吓我，你唔安慰都算喇，都唔駛潤我嘛……算喇，唔同你講，下次見獲打獲！」憤怒地掛線之際，仲好清晰聽到肥仔大叫：「爸爸，爸爸，唔好唔要我啊！爸爸……」

咁多人死唔見你個肥仔死，我都唔明點解自己會同一個咁口臭嘅人做兄弟，更加唔知點解鬼掩眼呢個時間打比佢！

利申，我唔係教徒，阿儀都唔係，呢一刻，我好理智咁諗，有咗咁點？

「落咗去！阿仔落咗下層喇。」商場有個男人同佢老婆講。

落咗佢……

我二十四歲，剛剛有份一萬二千八百蚊嘅工，住緊公屋，有三萬八Grant Loan仲未還，部iPhone供緊無耐，下個月嘅情人節禮物我仲煩惱緊……

綜合一切，好似……我未適合做爸爸……

阿儀神色沉重咁走出嚟，我深呼吸咗一口氣等佢宣告自己命運……

「阿鋒啊……你可唔可以認真咁答我一個問題啊？」
「好啊，你問嘅我一向都好認真咁答。」
「如果……我有咗，你會點？」
「呃……有咗……我覺得可以生出嚟嘅……不過……依家我哋事業先剛剛發展，又無樓又未結婚，如果……如果呢一刻我哋……」

「我有咗啊。」

好似粵語殘片咁一道旱天雷打落個頭一樣，我完全無晒意識，阿儀繼續問：「我有咗，所以我哋唔好太多廢話，一句講晒你要定唔要？」

「我……我……」

後來聽阿儀講返，我講「我……」長達五分鐘，而我自己係唔覺嘅……

突然阿儀笑笑口咁講：「我呃你咋！傻瓜！睇吓你，咁驚青，真係有嘅話點做人爸爸啊？」

聽到呢一句嘅我終於醒返，心入面一啖氣呼咗出嚟。

真係要唱返句「來回地獄又折返人間！」

－－－－－－－－－－－－－－－－－－－－－－－－－－

接下來，因為Facebook有字數限制，所以請到Google Doc入面觀看：

http://bit.ly/2MXiCDt

睇到尾，再返黎呢度睇最終回吧

－－－－－－－－－－－－－－－－－－－－－－－－－－

第三十五回－－承諾

大婚當日，最終Kitty都有出現，仲係伴娘，呢段日子我對佢已經無再嬲佢，即使佢係針對我，莫芷盈同我講，對付針對你嘅人，你唯一辦法就係做好自己，拗？有乜用，佢針對你你又點會拗得贏佢呢，要令佢哋失望，就係你活得比佢好。

兄弟到齊時，阿Kent佢拎咗條Banner出嚟，上面寫住立即開門，否則發射卸妝水，仲有幾支裝有不明物體嘅水槍……標叔叔就帶咗一堆破門工程用品，話有乜事就破門而入……肥仔佢話，拎咗個直升機公司電話，後悔的話可以直飛澳門，佢包。

而呢一切，都俾攝影師完全拍低，有時我哋會拎返出嚟睇，阿儀當然睇一次嬲一次話你班咩朋友啊！

最後，動用咗幾多人力物力嘅器材一樣都無用到，大家笑完爽完就正經返，接新娘了。

開門利是，其實流程好一致，一封大，再加一封細，除返開每人一千左右都已經收貨，但都要形式上留難一下大家，添少少再開門，咁先顯得有戰鬥過嘛。

但我嘅開門利是，除咗錢之外，早兩日我問咗阿儀，你班姐妹鍾意咩，最後我每個姐妹都買咗份禮物，有香水、有唇膏等等，俾利是佢哋之餘，我話：「多謝你哋咁多年都照顧住阿儀，陪伴佢成長，作為佢老公，我好想感謝你哋，雖然平時同你哋唔算熟，我相信你哋對我印象都唔會好得去邊，所以我希望你哋可以原諒我，以後大家一齊令阿儀更幸福。」

姐妹們都幾驚訝，對我班兄弟都好似無咁大敵意，果然，雞髀打人牙骹軟。

幾個環節過後，去到最老套嘅愛的宣言，一大篇不平等條約係我面前，我笑咗笑問佢哋：「仲有冇嘢要加？係就一次過喇。」俾著以前，我會好認真咁計較，但依家只係一笑置之。

隔住道門，司儀問有冇嘢想係見新娘子之前講，我話，我想唱一首歌。

雖然，我對周柏豪無乜好感，亦唔喜歡陳詠謙，但呢兩個人嘅《我的宣言》，真係呢個時間我最想唱嘅歌。

阿儀知我鐘意唱歌，佢話夜晚人多，你千祈唔好唱，要唱就朝早唱好喇，當我接到阿儀之後，佢真係好靚，果然一個要萬八一日嘅化妝師唔係惹少，將阿儀嘅美放大好多倍，我望住阿儀，無出聲，只係不停傻笑。

佢問我笑乜，我話，無，覺得你好靚，覺得我執到，覺得你唔好彩，哈哈。

跟住我再問佢，頭先首歌唱成點，佢話：「化妝姐姐話聽過咁多新郎唱歌，你算唱得好。」

我笑住咁拖實佢，開始敬茶。

中段時間無乜特別，都係影相，影到個人笑到好奇怪，阿Kent係我身邊不斷提我，笑啊，笑啊！
笑，其實結婚當日真係幾開心，但真心係攰，原來做主角，每分每秒都為你而生真係好大壓力，加上我一直都好緊張一陣要講嘅嘢，唔知其他人結婚會唔會特別開心，但我肯定係特別攰，終於明洞房花燭夜於現代社會唔存在。

一路影相、迎賓、握手、祝福、感謝，我唔知將來仲會唔會睇返呢張相，亦唔知對方會唔會睇返，但相只係留念，人到就已經好有心了。

律師上場，終於到咗準備證婚嘅環節，我已經知會咗律師將會講少少嘢先證婚，經佢介紹之下，我踏上呢個台，拎起咗一支咪。

「喺證婚之前，我有少少說話想同我未來老婆，以及大家講，相信熟悉我同阿儀嘅朋友都已經知道，我哋係奉子成婚，亦即係之前我哋仲未有結婚打算，直到我哋之間突然出現一個生命，我哋先做呢個決定。

二十四歲呢個年紀，算相當早婚，而且未有經濟基礎之下，呢場婚禮對我哋相當困難，過程之中，我哋都有爭執過，有卻步過，有猶豫過。

婚姻，我覺得係戀愛嘅墳墓，放心，唔係貶義，而係戀愛嘅終結，我哋以另一個形式一齊生活。

我，程日鋒，唔係一個咩絕世好男人，超級荀盤，有阿儀一個咁好嘅女仔肯嫁俾我，係我嘅福氣，係呢段時間入面，我做過好多事令佢傷心難過，唔似得其他新人一樣，大家上嚟讚吓對方感謝一吓，我希望俾到一個最真實嘅自己我老婆。

點解兩個人要結婚？係咪因為佢已經搵到心目中完美嘅另一半？知道對方係樣靚身材正，高富帥，溫柔體貼，無微不至？現實唔會有呢種完美情侶。

我曾經問過阿儀佢點解會肯同我結婚，我相信一定唔係有咗我嘅骨肉，而係，佢明知我有千樣萬樣唔好，佢清清楚楚，而且接受並同意咁做，唔似得大家從未睇過就click嘅條款及細則，阿儀佢每一件事都親身經歷，笑過喊過，但佢都願意接受我呢個人，呢個唔爭氣嘅程日鋒。

婚姻係一場修行，每日都見，會有開心事，但亦會有傷痛，兩個人，係完全獨立，大家唔同背景、文化、性格、習慣，邊個敢肯定自己另一半係Perfect Match？以後嘅日子，我唔敢講一定會令阿儀每日都開心快樂，但我希望無論面對任何事，我哋都可以一齊面對，一齊渡過，一齊解決。

我問過我老豆點樣會令一段婚姻更好，佢話我已經做咗，諗咗好耐我終於明，只要你一直問自己點去令呢段婚姻更好，你已經係做緊。

愛情又好，婚姻又好，無所謂完美，因為人隨時會變，只要佢唔再愛你，再完美嘅人都會離開，結婚從來都唔係終點，律師都唔會保證兩人將來唔會分開，而踏上呢種婚姻嘅賽道上，思考點去令兩個人更好，先係唯一嘅方法。

張佩儀，我應承你，一直都會努力令我哋更幸福，無論咩事都好，我都會對你不離不棄。」

阿儀無出聲望住我講完一切，我再次單膝跪低：「你願唔願意成為我嘅合法妻子啊？」

阿儀示意律師俾支咪佢：「問問問，唔願意仲會係度聽你講咁耐啊！程日鋒，我依家要在座咁多位見証，佢，程日鋒將會一生一世對我張佩儀不離不棄，會好好反省有咩不足，會一直進步，而我張佩儀會一直陪住佢，依靠佢，有咩事都會支持佢，鼓勵佢。

如果你清楚明白並接受的話，你就可以成為我嘅合法丈夫。」

「清楚明白接受！」
「我願意。」

律師佢接返支咪：「好，見証過咁多新人，我都係第一次見咁自動波，雖然佢哋兩人嘅誓辭同普遍唔同，但我相信咁多位來賓都感受到佢哋濃濃嘅愛，亦作出比誓辭更緊密嘅承諾，我在此宣佈兩人，成為合法夫妻。」

終於，我結婚了，終於，這個關於結婚的故事，完結了。

－－－－－－－－－－－－－－－－－－－－－－－

感謝你看了這個長達八萬字的故事

陪伴程日鋒一起成長，見証了一對小情侶在現實之下的掙扎

如果你喜歡這個故事，可以留言購買實體書

實體書會比網上版多了以下內容：

1）莫芷盈
2）五年後的程日鋒
3）蔣薇後記

另外會附送兩個網上故事《商戰》《方舟》，每本正價88元正，留言及分享可獲10元折扣，每本書也會有簽名

想購買的朋友，請留言查詢

亦歡迎大家說說看畢整個故事的感想

如果你是新讀者，可以看看我另一篇長故《老婆最後的十二個難題》

第一回連結如下：
http://bit.ly/37UXIw5

再次感謝，謝謝你花時間看我的文字

【 李香琴逝世 】
MeWe版本：http://bit.ly/3rUvdXF

收到李香琴逝世的消息後，我走到睡房的書架上，找回放在資料夾內的一篇30年前出版、刊於《壹週刊》的琴姐訪問影印本，我知道，我有很多事情想寫下來。

第一個原因，是琴姐跟已故的譚炳文一樣，她於香港電視業的地位舉足輕重，令人難忘的演出多不勝數；其次，一直覺得，琴姐的外型、打扮，甚至聲綫，與已於多年前離世的嫲嫲有點相似，這是小時候在嫲嫲家看電視時見到李香琴之後的既定印象，興許她倆經歷相似，都是30年代出世的女性，再由中國大陸遷居來到香港，所以或多或少都散發同類氣息，也可能，是我一直都很掛念自己的嫲嫲，所以望見琴姐，都會有點親切感，所以想以文字向琴姐致敬。

我由傍晚六時許開始動筆，寫了數小時才完成，因為琴姐瓣數多，而且記憶總是不可靠，她當打之時，都已經距離今天很遠了，得一邊寫，一邊花時間考證，收筆一刻，很疲累，但這些零碎的資料，都值得紀錄下來，讓後人參閱。

感謝琴姐生前為電視迷帶來那麼多美好回憶。

＃＃＃＃＃＃＃＃＃＃＃＃＃＃＃

「再見！唔好怪我第一句就同你講再見，因為我真係專程嚟同你道別㗎！」

從影多年的資深藝人李香琴，周一（4/1）中午不幸於伊利沙伯醫院離世，終年88歲，縱橫演藝圈60多年的繽紛人生，正式劃上句號，收到新聞短訊之後，立即在串流音樂平台重溫陳輝陽經典作《三千年前》（2007），「琴姐」聲演陳慧創作的對白，情感豐沛，聲線淒酸，一句「我失去嘅嘢實在太多啦！」，一句「你一定會好唔捨得我！」，配合關淑怡演唱的「趁熄滅前，還可一見」，對照這則消息，倍覺傷感。

「我記得，你同我去過嘅每一個地方，嗰啲地方，統統留喺我心裏面。」

其中一個地方是澳門的平安大戲院，那裏是她開展演藝事業的起點。

李香琴原名李瑞琴，祖父李亞敬舊時於廣東和澳門一帶經商，經營海產和賣米生意，家境富裕。琴姐於順德出世滿月後，父親李炳光舉家遷往澳門定居，據知李父經營錢莊及紙料生意，共有5位太太，而琴姐是家中長女，被視為掌上明珠。

原建於澳門亞美打利庇盧大馬路的平安大戲院，是李香琴演藝事業的起點。

30年前，因為拍攝亞視節目《向每顆星致敬》 （https://bit.ly/2JLjt8y） ，琴姐坐船過大海重回成長地，憶起往事。「就係呢間戲院，改變我一生嘅命運，以前任劍輝、白雪仙經常都喺度演粵劇嘅，咁阿嫲帶我嚟睇戲啦，睇睇下，我自己愛上咗粵劇，就算阿嫲唔帶我嚟，我自己都靜靜嚟呀，有功課都唔做，掛住嚟睇大戲，鍾意學戲，經過好多轉折，就搵到個師傅（小鶯鶯）學戲，學咗半年左右喇，師傅介紹我踏台板。真係橋喎，我第一次踏台板亦都係喺呢間平安大戲院。」時為一九四六年，當時琴姐才14歲，但大概由那時開始，便沒有想過要做「正印花旦」。「我認為做『正印花旦』壓力好大，點解呢？因為啲人會睇你做得好唔好，冚唪唥（焦點）都喺自己身上，如果做『第二花旦』就唔係咁喇，（如果）你個『正印花旦』演得跩啲，我做得好啲，就可以蓋過你，我幾有滿足感！」

何以演大戲會漸漸走進大銀幕？就在「糴梅香」（初踏台板之意）之後一年，即一九四七年，琴姐跟着盧冠廷父母（盧海天與養母譚秀珍）所屬的戲班「日月星劇團」到越南和新加坡做大戲，同行的還有「關師傅」關德興，後來關德興先返港拍戲，之後給琴姐寄信，指可以介紹她拍戲，琴姐開心到彈起，因為她會幻想自己有機會跟偶像張瑛、白燕和梅綺合作，豈料一入片場演出的銀幕處女作是《黃飛鴻大鬧花燈》（1956）（https://bit.ly/2MCw1Aj） ，飾演侍婢菊香，片酬三百，之後又經羅劍郎引薦，於電影中扮演奸角，憑《鴛鴦江遺恨》（1960）一「奸」成名，直至遇上「西宮」角色，大戰「東宮」余麗珍，獲得「一代奸妃」和「西宮琴」的稱號，迎來第一個事業高峰。琴姐曾在電視節目《正識第一》（2011）透露，為了演好奸角，要望鏡苦練：「走去睇住塊鏡講對白，修嘴型，修眼神，咁樣慢慢練番嚟！（如果演）陰毒，額頭要收細，連講說話（語氣）都唔同！」

此後，因為粵語片市場興旺，琴姐相當搶手，非常多產，更試過一年最多拍過50齣戲，但她坦言初出道的時候確實有捱過苦，因為她屬於獨立演員，沒有後台撐住。「關師傅唔可以部部帶挈我，我又唔打得，打戲都係搵任劍輝、于素秋，我又冇大老倌帶住，任冰兒都有任劍輝，譚倩紅都有方艷芬。試過有一次，我連接兩部戲，後來通告改咗，入到片場先知兩個（角色）都換咗人，我問導演點解要換人，佢反問我：你有冇大老倌帶住？我咩都講唔出。」

後來，父親李炳光因生意失敗，家道中落，琴姐要負起養家責任，為了令父母弟妹有更舒適的生活，於是只好甚麼片約都接受，那怕是別人不願意飾演的奸角，一樣去馬，甚至知道別人拖欠她片酬，她依然不敢投訴，生怕將來再沒有機會演出。可是，無限忍耐沒有讓琴姐好過，當她的戲愈演愈多，片酬由最初三百元升至二千五百元時，電影公司卻嫌她騷錢貴，找了另一位演員頂替，當年專訪裏公開名字，那人是羅蘭。演藝圈從來現實，三分努力七分運氣，當她在電影圈前景暗淡時，其實粵語片亦逐漸式微，取而代之的是電視製作，無綫電視啟播後兩年，當時36歲的琴姐順理成章往九龍塘廣播道尋找機會，先加入無綫，拍過劇集《錄音機情殺案》後，一九七○年轉投麗的映聲，拍攝《家春秋》，數年後又回歸大台，由一九七二年開始成為《歡樂今宵》的台柱之一，另外亦不斷拍劇：《狂潮》（1976）、《家變》（1977）、《網中人》（1979）、《親情》、《輪流傳》（1980），數之不盡，套套經典。

琴姐憑眼神、面容和聲線，能夠將陰險、淒涼、霸氣、嬌嗲、滑稽、慈祥的角色演得入木三分，角色是她，她就是角色，在鏡頭前那種揮灑自如，你未必記得劇名戲名，但一講起，畫面就會浮現。如《無頭東宮教子鬧金鑾》（1961）扮演西宮，大戰「東宮」余麗珍，或者《還看今朝》（1990）的姚文珠，令人狠得咬牙切齒，欲當街指罵；又如《輪流傳》（1980）和《流氓大亨》（1986）扮演慈母，面對命途多舛的人生，有苦自己知，總是含住泡眼淚，淒涼得教人鼻酸；當然還有在《他來自江湖》（1989）的「靚姑」，有一幕她與何鑫淼（周星馳飾）在何英彪（吳孟達飾）面前唱雙簧 （https://bit.ly/2Lq5xkF） ，或者於《家有囍事》（1992）裏扮演奶奶大叫「世界末日啦！」，總是睇一次笑一次，多年不變。

說霸氣，又怎能不提《倚天屠龍記》（1986）的滅絕師太，以及《碧血青天楊家將》（1994）的佘太君？還有晚期她在《溏心風暴之家好月圓》（2008）飾演的甘佘君麗，一句「唔使驚，嫲嫲喺大廳」絕對見字如見聲吧。這邊演活傳統價值觀下的中國女性，其實曾幾何時，她亦試過跟歐美時尚接軌，譬如《彩色人生》（1979）扮演模特兒公司老闆娘的Mary，每一集都更換造型，媲美繆騫人的《甜姐兒》，應該沒有很多人看過；某年在亞視台慶夜穿金色吊帶舞衣「惡搞」麥當娜（Madonna）跳唱《Vogue》，盡顯其時尚大膽一面，原來是很多人的Best Kept Secret。多才多藝就是如此，因為琴姐很年輕的時候已明白，要在戲行生存，除了專業，還是專業。

在興盛時代的無綫打滾十多年後，琴姐已非常有名，但為了還人情債給周梁淑怡（時任亞視行政總裁），1990年決定過檔，那時她在大台的最後一套劇集，正是《他來自江湖》，她記得拍到最後一集的時候，時任無綫高層李沛權搭着她的膊頭，就要為她開「期票」：「琴姐，兩年後就要返嚟喇，使唔使簽定合約？點知我過咗亞視，李沛權都跟埋過嚟，到我再續約（亞視），佢又走喇，所以做人真係唔使咁認真！」就是這一句話，反映出琴姐當年受訪時的心境：名氣、錢財如浮雲，放過自己一馬，別太着緊，因為在這一行打滾了數十年，有甚麼事情沒見過呢，執念只會令自己活得不開心。

她享受演出，但心頭不高，沒想過要做女主角。「我入戲行，阿爸同我講，結婚，未必嫁得好，你鍾意做戲就做戲，話總之搵到食就算。我從來冇諗過做正印，做二、三幫已經心滿意足喇！」這段說話，摘自1992年10月16日出版的《壹週刊》「金峯集」專欄，當時負責採訪的是李志豪，2016年他離開壹傳媒的時候，職位是《壹週刊》社長。重讀這篇30年前的人物專訪，會看到琴姐的人生觀：人生不過是一場夢，不用太認真，更不可有風駛盡𢃇。

「我哋呢行真係偏門嚟㗎，你唔知幾時會唔紅，亦唔知幾時會紅，諗都諗唔到。所以我覺得紅嘅時候唔好太得意，唔好（畀）勝利沖昏頭腦，唔係咁樣，一跌咪好辛苦囉！」賺到錢，生活過得去便可以了，琴姐當時認為自己條命已如打牌打到北圈，剩下的，都是Bonus，沒有很多事情可以傷害她，就算以往吃過的苦頭，變成回憶後亦只剩下快樂的片段。「我好樂觀，從來冇恨自己可以有家財億萬，我經常覺得，唔好成日諗住人哋坐Benz（平治）230，我就要坐450，咁樣成日都唔會開心。」

惟獨有一件事，任時日過了多久，她仍然放不下，那是母親突然去世。一九六五年某夜，琴姐在戲院看戲，突然銀幕上出現了一句字幕，大意是：「李香琴，即出門口，有人找你！」

此話一出，現場霎時間亂作一團，琴姐以為是否有人整蠱自己，當她走出戲院門外，赫然見到妹妹正在等她，原來是她的媽媽因為心臟病發過世。「佢個心唔舒服，醫生以為係胃病，打完針之後半個鐘就死咗。」這件事對琴姐打擊很大，因為她還以為自己終於可以讓母親過得好一點，但計劃從來趕不上變化。「我啱啱儲夠錢喺太子道買咗層樓，屋契寫咗佢個名。」自己無法見到母親最後一面，成為一生最痛，但也知道那是每個人的必經階段，所以很早已吩咐女兒，如果有一天自己口齒不清，或再不能照顧自己時，便送去老人院，不要為家人添麻煩。今天看新聞，知道琴姐在女兒陪伴下撒手塵寰，生離死別當然教人傷心，但她的精彩一生，將會永遠刻在大家的心底裏，永誌不忘。

原文刊於《香港01》：http://bit.ly/3orZBqi

【 相關文章 】
譚炳文逝世：http://bit.ly/2XbtH5p

（05012021）

＃游大東 ＃游大東影視筆記 ＃李香琴 ＃電視史話 ＃三千年前 ＃武視 ＃無綫 ＃家有囍事 ＃周星馳 快樂的 ATV 亞視數碼媒體 William on the way 葉一知 港女講劇 做乜膠睇電視 歐錦棠 Stephen Au 鄭美姿 譚蕙芸 #TVB 阿果 ＃澳門 ＃粵劇 ＃港劇 十字牌早餐 LAW少 午夜翻牆 紅眼

[AMMHK][限聚音樂 Hear To Feel]

當日林文龍由亞視轉去子公司AMM 亞洲心動娛樂 Hong Kong做副總裁搞OTT平台，唔少人都抱觀望態度，甚至有人估計佢旗下節目點都搣唔甩陣亞視味。直至佢哋個音樂節目《限聚音樂Hear To Feel》第一集出咗街，有趙學而同Serrini對談對唱，反應唔錯，真係唔似亞視，仲多咗陣chill味，觀眾好似跟埋上船去聽歌手傾偈同歌唱咁，又有維港景、日落景睇，成個feel好正。

其實「戶外拍仲要出海」+「音樂節目」兩個元素都係搵自己笨。前者不可控制因素勁多，好似係日光變化、風聲收音等等。後者要另外有隊band，要同歌手練吓夾吓，後期又要執聲，多好多嘢做。多嘢做就要多啲人手，自然要多啲錢。成日聽到人話亞視資金好唔穩定，所以我一睇到個節目時都嘩咗一聲：喂！都好揼本喎！

八過吓~ 《Hear To Feel》嘅編審Judy話個節目係用電視嘅scale去做，監製阿麟透露音樂節目至少貴其他類型嘅電視節目兩倍。依家出到嚟嘅效果係幾好睇，同電視機播嘅音樂節目、其他online platform嘅音樂show有得比拼吓。

雖然兩集以來啲歌聲聽落有啲重味精，但係歌手對談嗰part我覺得有啲嘢落袋。有時作為觀眾睇音樂節目真係睇到好氣餒，我睇音樂節目梗係想聽歌手講音樂啦，但好多時啲主持好似唔知自己主持緊嘅係音樂節目，無啦啦會講吓節日準備去邊度玩，睇到反白眼發忟憎。《Hear To Feel》就冇呢個問題。（其實根本唔應該有呢個問題）

編審Judy話佢哋唔想用MC，就係想歌手多啲機會講多啲，加上OTT播，暫時冇airtime限制，可以由得歌手隨心講，講到啱feel先唱歌。不過佢哋又唔係free ride嘅，製作團隊喺搵嘉賓時已經開始做足功課，要搵啲差唔多feel、覺得佢哋有共同話題又啱傾嘅嘉賓，之後會畀啲題目佢哋傾，亦會畀佢哋自由發揮，講佢哋想講嘅嘢，所以內容chill得嚟，又唔會左講右講唔知講咗去邊（Judy話由day1至第一集出街總共出咗18個guest list version!!!）。第三集見到有釗峰同Jay Fung已經放心，聽聞之後仲有6號@RubberBand、小肥、Kendy同小巧。吓吓見到啲嘉賓組合都係「咦～估你唔到」 都係一種玩法！

睇返前嗰幾年，香港嘅音樂節目畀唔到觀眾動力去追睇，可能係內容上走咗樣。想聽歌嘅聽唔到，想聽歌手分享又冇。到OTT出現，畀多咗好多嘢大家去揀嚟睇。同時都對製作節目嘅人當頭棒喝：「你拍嘅嘢係想講啲咩？」有msg傳達先會吸引到人去睇，再唔係好似以前咁餵咩料畀觀眾，佢哋都照單全收。做好內容，言之有物，係包括OTT、電視台等創作平台要捉住嘅製作重點。

第1集：趙學而+Serrini
https://youtu.be/lzo54V4ZYqg

第2集：林德信+許懷欣+The Boogie Playboys
https://youtu.be/2IcXmVIET8M

第3集：梁釗鋒+馮允謙
https://youtu.be/4Mq0ZLgMySQ

#HearToFeel會變咗個品牌
#旗下再搞唔同音樂計劃
#佢哋話已經搵咗學而Serrini喺2021年搞其他嘢喇好嘢

#AMMHK #亞洲心動娛樂香港 #限聚音樂 #HearToFeel