關於 七人樂隊余香凝 ，我們在網路上蒐集到這些相關的討論、資訊與評價

《七人樂隊》譚家明嗰段《別夜》好好睇。
余香凝做得Very好。

［拉闊音度］電影節開幕電影，《七人樂隊》譚家明嘅《別夜》用咗呢首歌，《深夜港灣》，老嘢（四十以上）必識。原曲山口百惠嘅《秋櫻》（我都未出世），戲入面播係甄楚倩嘅版本，啱時代背景，亦可能係佢最出名嘅歌。至少佢在「民主歌聲獻中華」都係露出小蠻腰唱呢首（係好有喜感的，仲有李克勤唱《深深深》）。當然我仲識《今天天氣呵呵呵》同《戀愛傷身》

但我聽嘅，係關淑怡嘅翻唱版（無獨有偶兩個都神神化化）。嗰隻翻唱碟Ex All Time favourite 評價好高，二手炒價都勁，絕對係我心中最重嘅香港專輯之一。時為1995年，我考會考，呢首歌我應該聽咗近千次

所以，我當然好熟歌詞。然後今日睇戲認真聽（一面睇住余香凝個bra，雙重享受，劇透了）（你諗下如果係聽余香凝睇甄楚倩就錯晒）（其實當年都幾得嘅），就發現，喂，啲歌詞唔同喎

搵返歌詞，的確有啲唔同的，仲有啲字根本原本冇。我估九成係關淑怡臨場興起自己加字，監製又見唱得好，就當然照去。

至於邊個版本填得好啲，就等大家「僧推月下門」咁推敲推敲了

拿，同我睇戲嘅女，散場就有呢啲聽了，當然加返句「你好勁呀」就更妙（男人都係鍾意女人讚勁）。不過而家就得返埃汾太聽我講。「所以咪要寫上網」

又，當年嘅中文聆聽，我係拎個C嘅，「證明香港考試制度真係埋沒才華」「好彩大分都A」（其實我事隔廿幾年先發現歌詞唔同，應該拎U）

Anyway，套戲相當好睇的。「唔好掛住睇余香凝個bra」「仲有馬賽著旗袍」「仲有林愷鈴著熱褲」「咁你鍾意睇佢老母都得嘅」（係，有龔慈恩）

正經（雖然上一段都好正經），套戲係好睇的，當然老嘢睇更好，仲會明啲「彩蛋」。

例如洪金寶，之前《七小福》演師傅于占元，而家就拍返，搵洪天明演返佢師傅于占元。

又例如，袁和平拍嘅一段，元華要食漢堡包，就明顯向《摩登如來神掌》致敬，「大俠愛食漢堡包」。雖然係港產片，但套戲在台灣好hit，你問四十以上嘅台仔好多都知

又當然，仲有杜琪峰嘅《遍地黃金》，就呼應返佢自己嘅《碧水寒山奪命金》，以及《奪命金》

牛年比別人知得多。subscribe now.
Patreon.com/ivanliresearch