【晞。觀影記事正式踏入第13個年頭】
同大家回顧咗咁耐，冇錯，今日就係「晞。觀影記事」嘅13歲生日。13年前嘅今日，我無心插柳喺舊嘅Sina寫咗第一篇文章《鬥智21點》，純粹係因為自己身邊冇人鍾意睇戲，長期一個人睇完又冇人可以分享，不如俾個樹窿自己上網講。點知，一講真係有回應；點知，一講就講足13年；點知，仲由Sina開到自己有個網站。
13年係一段好長嘅時間，當年同期嘅Blogger，好多都唔知去咗邊。呢個網站都陪伴我度過人生好多大大小小階段，亦因此識到好多讀者朋友、電影業界同廣告公關，好多私底下都做到好朋友。有日發現，我朋友唔多，當中佔據咗好多嘅，都係因為「晞。觀影記事」而識到嘅人。成日話咁辛苦run嚟為乜，可能某程度上真係一個情感寄託，甚至係人生一部份，冇咗呢度，我好難想像，我呢13年嚟會點過，我人生都會完全唔同。
由呢個場認識到好多真實嘅朋友，舊年都係好難過嘅時期。即使12週年做到好成功包場活動，同時更多讀者朋友從此喺FB/ IG退場，喺網站做個唔留言嘅人，更多係移民去外國，喺地球上另一邊支持，仲有電影業界嘅終極寒冬，最熟嘅電影業界朋友、記者朋友，幾乎隔日就收到「Goodbye and thank you」email，你突然之間會覺得，曾經以為呢樣嘢可以一直做落去、呢啲關係可以一直維持，但原來好多嘢，真係一夜之間，甚至連對方都估唔到咁快，就會斷咗。
自己喺呢一年都經歷咗太多事，一年被炒三次、Freelance突然會冇曬，再經歷埋感情創傷，又突然以為自己有重病，接二連三嘅意外，我舊年曾經有埋嚴重抑鬱。當你以為戲院呢個永恆嘅朋友可以陪伴你時，原來戲院經得起烽煙四起大戰、經得起十號風球，但經不起疫情，而你除咗硬食Netflix爛片爛劇，甚至曾經無聊到一個地步，爛劇都要慢慢睇，因為咁快睇完，你冇工開而街又出唔到，已經唔知可以有咩做，抑鬱突然又來襲。你完全搵唔到咩娛樂排解，都曾經想寫啲咩都寫唔出。
第12年，係我經營最困難一年，都係我人生中最唔開心一年，希望第13年會好啲。
早排好興講致一直在堅持的人，好多讀者朋友都有同我講呢樣嘢，似乎大家都覺得我好風光咁。背後受咗幾多閒言閒語、冷嘲熱諷，只係冇同大家講姐。今時今日，堅持一件事唔容易，喺身心俱疲嘅情況下仲笑住咁去堅持，更難，我舊年深深體會到。知道我舊年發生咩事嘅讀者朋友，有問過我有冇嘢，點解咁人生低潮仲可以日日出文、仲可以抽水搞gag。其實，我嘅堅持，一方面俾到資訊大家睇、一方面都多謝大家俾個機會我，去營造個搞笑形象。生活好多時唔如意唔開心，喺度同大家搞gag抽水，有時都可以搵得返自己。唔好諗到「堅持」咁偉大，當中有唔少比率，都係俾我喺度排解返現實嘅不如意。
嚟到13週年，香港已經唔係昔日嘅香港，要搞個包場，你要涉及嘅問題更多更廣，有好多「紅線」都要顧慮，而就算係普通商業世界，一年前一年後已經徹底唔同。一年前嘅成功，同一年後未開始搞已遇到嘅接二連三挫敗，估都估唔到，但我都想呢個包場傳統可以一直做落去。
假如大家仲喺香港，又或者仲在世界某個角落，呢個包場傳統可以一直做到20週年嗎？無論喺香港，定還是我哋某日喺世界其他角落再聚，希望每年6月20日前後呢段日子，都可以同大家見面。
希望，今年都可以如願同大家見面。
包場仲未成功，我仲要幾日內最少多100人先至可以照去，兩個page加埋有三萬幾follower，唔需要三萬thx，但搵多100人可以嗎？全港最早《黑寡婦》預售！撲飛詳情請睇：https://bit.ly/35EHdTf
最後，俾自己一句生日快樂。
利申，今日係「晞。觀影記事」生日，唔係小弟本人生日，年年都有人以為今日係小弟本人生日，未至於擦存在感擦到自己生日都上嚟講😂
thank you and goodbye email 在 Thank You Resignation Letter To Coworkers - Gotilo - Pinterest 的推薦與評價
Aug 4, 2020 - Goodbye Email To Coworkers After Resignation. Download Thank You Resignation Letter To Coworkers. Download Farewell Email To Coworkers. ... <看更多>