［肺炎受惠股有好多種，不過外賣app係冇份的］
又係獨角號獨家文。記住大家支持下，我有百幾個朋友like咗佢地Page，其實都佔佢地3%。你未去嘅記得去。重點合作黟伴嚟的
1. 講返正題，世事冇你估咁簡單，肺炎之下，外賣app唔係做到手軟，而係玩手指拍烏蠅，至少英國係咁。
2. 「肺炎受惠股」，有好多種。有啲直接啲，好似ZOOM咁，要商用多功能就要科水，而企業一般不介意。例如寫過王維基嘅香港電視（1137），英國嘅Ocado（網上雜貨舖喎，富時一百年初至今一度得佢一隻升），或者美國嘅藍圍裙（Blue Apron）—跌完九成幾，但上個月升十倍，生意係送料畀你在屋企煮飯仔，畀埋調味料呀之類你，教埋你煮，等你專心做要做嘅事。
3. 有啲係間接啲，例如互聯網供應商，甚至Slack，甚至Netflix，你好似用多咗，但其實未必畀多咗錢—當然之後佢加你價係後話。
4. 而有啲，就係假受惠股。例如各式嘅送外賣App，UberEat，FoodPanda，Deliveroo之類。
5. 香港唔知，反正冇公司上市，但至少英國係咁。你以為人人唔出門口呀，WFH呀，或者炒魷魚呀，就叫多啲外賣。其實唔係
6. 好簡單，你見咩UBER之類，成日科水做公關稿（唔係你以為係乜？），講往年邊個叫足三百日KFC，邊區最多人叫Pizza咁。你見唔見呢排出嚟講有幾多單？只係不停話你知做步兵好好搵，嘿。
7. 點解唔講有幾多單？斷估都係啲單唔多掂。至少英國見到，啲外賣柯打係勁跌嘅。話跌成六七成咁滯，嘩。如果係中央倫敦更加勁，午餐柯打近乎消失晒。正常，中央倫敦啲富貴但忙嘅金融撚，如果唔係公事出去食，十居其九都係叫外賣。唔係冇錢，係冇時間。
8. 呢個係幾有趣嘅，因為之前唔少人以為係商機，點知剛好掉轉。
9. 點解？首先係怕死，驚個外賣仔播菌，另外仲有係好多餐廳根本收埋皮，外賣都冇得做，例如英國嘅Wagamama係收晒工嘅（完全唔好食，劣食大國真係唔係講笑）。當然仲有係，WFC嘅，在屋企一路上網一路煮又得，落樓下食又得（唔使每日返工慳返好多時間喎）。亦有係直頭失埋業，慳啲洗，但又有時間，梗係自己煮。畢竟叫外賣嘅人係咩人？就係忙人。
10. 咁就梗係屋漏逢夜雨。其實同Airline 嘅情況差不多—好景嗰時都唔係好賺錢莖至唔少都輸錢，而家咁環境更加係大鑊。當然最大影響係Deliveroo，已經冇乜水，原本亞馬遜注資，但分分鐘畀監管當局叫停（係咪卒之發現英國係乜都管架呢，炒人又管，派息又管，連搵人注資都管）
11. UBER就醒啦！間公司我一路冇乜好感，但至少有一樣嘢做得極好，就係上市嘅時機，一流，真係佢上完就泡沫爆，之後就肺炎。有咩開心得過自己拎完錢而對手拎唔到？而家一齊燒錢，佢唔使跑得快過隻肺炎熊，佢跑得快過啲對手就得了。
12. 咁然後，英國直頭閂埋餐廳同酒吧。咁，送乜春？雖然外賣app已經盡力留客，幫返餐廳，抽佣抽少啲，找數找快啲，但都返魂乏術。
13. 仲有個問題係，英國政府包底，你做正規軍嘅，可以八折出糧—但做外賣步兵嘅，自僱人士噃，好聽就多勞多得，難聽就手停口停。咁嘅時勢，梗係樹大好遮蔭啦
14. 另外，真唔知，睇返FT嘅文講（https://on.ft.com/2JsnMlw），原來外賣台都要好似商場或寫字樓咁，有Anchor Tenant，在英國就係Wagamama同麥當勞（哈哈），兩間收咗皮，就連鎖反應了，啲友見到冇得食老麥，就其他嘢都唔叫，甚至之後唔叫外賣。
15. 呀，in case anyone care，我到而家都係冇用過外賣app嘅。實情我係連外賣都唔叫。唔係因為我太忙，主要係唔鍾意屈在寫字樓。況且而家唔少餐廳（我去開嘅）直頭可以whatsapp 落單，連打電話呢個咁難（＊）嘅過程都慳返。而以我不停咁叫同一樣嘢嘅習慣，直頭copy and paste，或者star message然後自己回自己就得了
（＊）應該唔係咁多人知，但我有相當多莫名奇妙嘅恐懼症，免得過都唔好。例如我好怕打電話，特別係訂枱食飯，一係囡囡訂，一係公司啲Ｏ靚訂（咁當然我請）。正如我都好怕點餐，同樣地，基本上都係我同完囡囡講，佢再同侍應講。我仲會講明幾個後備方案，慎防例如呢樣冇嗰時，都唔使再問我。而遠古年代，未結婚前，唔少約會過嘅女仔都對呢樣嘢相當反感—所以我咪冇同佢地結婚。所以日本迴轉壽司嗰啲篤iPad就啱晒我！一蘭都很好。或者自動販賣機都好啱。
pizza 皮 供應商 在 多堤拉披薩供應商 - Facebook 的推薦與評價
多堤拉披薩供應商, profile picture ... 冷凍披薩麵團200公克/顆冷凍香料披薩麵團200公克/顆薄脆烤餅餅皮6～12吋香料烤餅餅皮6～12吋原味厚片餅皮6～10吋四方型&長方型 ... ... <看更多>