(貴boot平買)香港嘅貴版波boot唔難揾，但係去親啲大鋪，往往個價錢容易令人卻步。一對正價貴版boot，至少$1200起跳。無咩多餘錢，但係又想過下球星嘅貴版boot癮，夠竟有咩計仔？今日小編就同大家走訪香港嘅"尋boot聖地”。
買貴版平boot，首先唔可以追最新款，二，要有耐性，因為平嘅關係分分鐘會無自己size，所以建議大家抱住一個尋寶嘅精神！
小編向大家首先推介嘅係觀塘嘅駱駝漆大厦，裏面有三間outlet，其中兩間更加係Nike 同 Adidas，入去兜個圈，時不時有驚喜。小編就五月份入去兜個轉，Nike MercurialX finale 四百蚊有找，Adidas X 15.1同Messi 15.1 都係七百蚊有找，X 15.2更加係賣三百，最估唔到係遇到Puma Evospeed 1.4藍色半價！(圖1,2,3)
第二個地點我會推介旺角波鞋街，嘜波鞋街會平賣貴boot架咩？的確係會有，有時候價錢更加會估你唔到。第一間就當然係Nike football啦，買上一兩批嘅鞋不時會見到六折(包括高筒)，五月份小編就見到六百蚊有找嘅黑色Magista Opus(補圖)，以及千四蚊有找嘅Magista Obra同Hypervenom Phathom 2。波鞋街嘅Adidas Football同New Balance都間唔中會遇到七折或以下嘅貴版boot，再加埋麥花臣後面嘅允記旗艦店，裡面有時更加會有puma嘅特價boot，簡直係波boot嘅尋寶聖地！(圖4,5)
除此之外，東涌嘅東薈城outlet，灣仔嘅Nike football同對面馬路間鞋鋪，北角嘅和富中心outlet都係小編最喜愛嘅尋boot聖地，唔知大家又有無邊啲聖地呢？不妨話翻俾小編喎！😁
去到小編本月推介！唔知咩事NB波boot全線減價，無論Visaro定係Furon都係七百頭就有交易！小編試過兩對落腳，感覺上Visaro舒服啲，又保護性強啲，Furon就……小編夠膽歸納佢為一對速度性跑鞋，非常輕巧！(圖6)
最後仲有一個長期推介: 馬拉松大部份分店都賣緊嘅 Tiempo Legend V 黑色加黃色潑墨pattern。小編懷疑呢對係馬拉松嘅錯誤投資，佢係晌第六代Tiempo出咗一排先大量入貨，小編個時仲見佢賣成千四，四月開始呢，七百頭就已經有，簡直係Tiempo愛好者嘅喜訊！(圖7)
