Search
《金宵大廈》Baby-Mia一角就係佢嘅告別作～
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
FanPiece🖋https://www.fanpiece.com/
instagram https://www.instagram.com/fanpiece.hk/
#FanPiece #歐陽巧瑩
*嚴禁劇透*
*粗口自行過濾*
*可瘋狂話戲屎但免外表批評人身攻擊*
·
·
[1230隔夜超短劇評][TVB][金宵大廈 EP19&20 大結局][夢遊]
·
[讚] 等了又等，終於集中講返阿蕭Alex、Coco旭輝同埋林哥仔林老師呢段超過50年時空嘅戀情。
·
喺最後一次回到過去嗰陣，船上面場流星雨，嗰段阿蕭同Coco話始終都改變唔到命運嘅對話，好感人催淚。如果佢真係好似一開始籌備拍攝嘅計劃咁，每一周先播一個單元，我諗佢剪返以往片段嗰吓嘅仿如隔世感覺仲強烈，可能仲好睇。不過世事無如果，依家個效果都唔差。
·
阿蕭同Coco喺60年代死咗，改變咗歷史，嚟到今時今日，Alex仲係空姐，避過咗失聯航班，所有人物嘅發展都同中有異，喺香港咁重氣壓嘅時候還啲角色一個好結局都係一件好事。阿廣揸巴士同東東小惠感情唔錯；何太應該冇咗個BB之後轉咗養狗仔又好，佢冇得生BB所以養狗仔都好，都可以從無咗個BB當中解脫；Mia成為韓星，李家俊應該仲係鼓勵佢完成夢想嘅人，因為佢拎住咗嗰隻Graffiti加油免仔；膠罐、Kelly、Simone再遇；金丁變咗做蔡san Carman嘅招牌手工啤酒；阿Raj變咗小食店老闆、佳爺變咗看更、晴晴變咗好似融合埋Mary性格嘅情趣用品店主。
·
新Alex同埋新阿蕭（容許我咁叫佢哋）都已經走出咗金宵大廈，但最後又係喺個有流星雨嘅天台度相遇，呢個約定原來係生生世世。佢哋兩個嘅眼神亦都暗示咗佢哋都應該仲有Alex Coco 阿蕭 旭輝 嘅回憶。最後李施嬅望住陳山聰啲眼淚剛剛好，好怕佢哋走埋去對方然後完，好在係企定定。
·
我亦都好鍾意林老師、林哥仔、靚寶一齊企喺比bar更高嘅另一幢天台度望住Alex，做一個永遠守護Alex嘅角色。呢吓抽出嚟，超越晒三個時空，唔錯喎，我覺得可以代表住三個時空都真係出現過，避免咗新時空呢一幕同之前咁多集嚴重割裂。
·
[彈] 呢句都仲係讚嚟，喺新時空咁多個單元主角嘅新生活裡面，我最滿意係Yuki同埋水哥嘅新生活。Yuki因為喺以前嗰個時空太過執着自己嘅外貌而出問題，但喺新時空佢就盲咗，當然可以解讀為佢終於唔係睇外表而係睇內在，但我最鍾意佢嘅原因係因為佢盲咗，我認為一個業報嚟，呢啲喺其他單元角色嘅新生活當中係見唔到。
·
講返兩次穿越時空，第二次時嘅改變係有，但如果可以有多啲分別，但最後結果兩個主角都要死嘅話，咁個努力都改變唔到結果嘅感覺會再強啲，到尾段新空間佢哋有新生活嗰種睇落去釋懷嗰吓又會強烈啲，大結局嗰個起伏就會大啲。
·
覺得唔夠喉嘅，仲有呢個單元先真正講林哥仔迷糊會變做怪物。我明之前都有鋪排，例如係怪聲同埋對靚寶講嘢，仲話要放怪物出嚟咬佢，但如果之前再加多少少，或者喺林老師嗰度放多啲奇怪感覺咁就好喇，之前好多時都只係以為佢掛住Coco 掛到傻傻哋，嘥咗劉江老師。
·
最後一個單元一口氣接住落都係講兩位主角加林哥仔咁濟，但角色情緒都一樣有甩漏。阿蕭完咗第一次穿越之後，明明應該好沮喪或者好擔心，總之應該有啲負面情緒。但由佢完成第一次穿越出咗浴室，到佢去到佳爺度見到招牌豬扒飯知道歷史可以改變， 中間冇咗個情緒。喺阿蕭身上成日都有呢個問題，如果係表示佢成日發夢搞到渾渾噩噩，喺前段都仲可以解釋到。但去到大結局單元都仲係咁就有啲奇怪，因為佢已經將啲夢串連咗一齊。呢啲位真係好影響觀眾投入，雖然好似好細微但影響好大。
·
[演員表] 陳山聰 飾 蕭偉明、劉旭輝 / 李施嬅 飾 Alex、Coco / 林子善 飾 膠罐 / 歐陽巧瑩 飾 Mia / 黃子雄 飾 佳爺 / 陸永 飾 蔡San / 康華 飾 Yuki / 劉江 飾 林老師 / 黃致豪 飾 水哥 / 張彥博 飾 林哥仔 / 鄧佩儀 飾 晴晴 / 陳振華 飾 Raj / 張曦雯 飾 張曦雯 / 林秀怡 飾 Simone / 譚凱琪 飾 Carman / 陳嘉輝 飾 大隻廣 / 高海寧 飾 小惠 / 鄭耀軒 飾 東東 / 何啟南 飾 雄哥 / 周麗欣 飾 林哥仔母 / 楊證樺 飾 林哥仔父 / 鄧英敏 飾 林哥仔叔 / 楊凱博 飾 童年林哥仔
·
·
#1230隔夜超短劇評 #TVB #金宵大廈 #葉鎮輝 #羅佩清 #陳山聰 #李施嬅 #林子善 #陸永 #歐陽巧瑩 #黃子雄 #康華 #劉江 #黃致豪 #張彥博 #鄧佩儀 #陳振華 #張曦雯 #林秀怡 #譚凱琪 #陳嘉輝 #高海寧 #鄭輝軒 #何啟南 #周麗欣 #楊證樺 #鄧英敏 #楊凱博
*嚴禁劇透*
*粗口自行過濾*
*可瘋狂話戲屎但免外表批評人身攻擊*
·
·
[1230隔夜超短劇評][TVB][金宵大廈 EP17&18][Simone]
·
[讚] 可以自我學習而不斷提升智能嘅AI，幫主人結識伴侶，係個好吸引嘅題材。我最鍾意喺膠罐間舖頭裡面，唔同嘅AI程式自己傾偈，亦都講到點解AI會自己進步。林秀怡聲演Simone係唔錯。
·
[彈] 繼《娃》之後 ，又一個我覺得好鬼可惜嘅單元。愈來愈有自由思想嘅AI，加上一個只係識得打機同埋整電話嘅毒男，係個好鬼正嘅人物設定。不過可惜見唔到佢哋關係嘅轉變，由始至終膠罐都係討厭升咗級之後嘅Simone，覺得佢多多聲氣好鬼串。亦都見唔到膠罐喺生活大事上依靠Simone，兩個「生命」只係從屬關係，連朋友都未係。如果唔玩同AI產生友情，咁不如玩從屬關係，但呢個關係又唔太緊密，Simone好多時都自把自為。最後原來係玩AI失控，但無道德規範嘅Simone最多都係用威脅去解決問題，去唔到太盡。
·
如果Simone同膠罐嘅關係，係由從屬發展到朋友再失控嘅話，我覺得老套，但係基本保證有嘢睇嘅故事發展脈絡。唔好再話兩個鐘一個單元講唔到喇，都浪費咗咁多時間去打機，但係就乜都講唔到，我明畫面上玩味上拍遊戲打機嘅內容係幾好，但如果推唔到個劇情係就無謂喇…… 如果話Simone係打機方面係擺明幫膠罐，幫佢同張曦雯溝通，其實係三個「人」打緊機，已經好好多。好過就咁話膠罐睇咗攻略過關咁無意思啦。
·
呢個單元佢放喺開頭一兩個故事會唔會好啲呢？佢差唔多串連晒所有嘅異奇故事，當係預告，或者專登寫到同之後單元故事嘅發展唔同，擾亂吓觀眾都幾過癮。
·
我仲以為潘朵拉出現係有咩重要嘅轉捩點，其實都冇乜作用。我甚至覺得潘教授呢個角色同《金宵大廈》成套劇有啲矛盾，因為《12傳說》係話每個靈異故事都係作嚟，係為咗掩飾一啲不可告人嘅事，幾乎推翻所有靈異嘢。但《金宵大廈》係走相反方向，好多嘢都唔用理性解釋而係用靈異包返個故事。仲要安排潘教授喺最後最重要嘅一個單元之前出現，自打嘴巴嘅力度都唔細。
·
[演員表] 陳山聰 飾 蕭偉明、劉旭輝 / 李施嬅 飾 Alex、Coco / 林子善 飾 膠罐 / 歐陽巧瑩 飾 Mia / 黃子雄 飾 佳爺 / 陸永 飾 蔡San / 康華 飾 Yuki / 劉江 飾 林老師 / 黃致豪 飾 水哥 / 張彥博 飾 林哥仔 / 鄧佩儀 飾 晴晴 / 陳振華 飾 Raj / 張曦雯 飾 張曦雯 / 林秀怡 飾 Simone / 林夏薇 飾 潘朵拉
·
·
#1230隔夜超短劇評 #TVB #金宵大廈 #葉鎮輝 #羅佩清 #陳山聰 #李施嬅 #林子善 #陸永 #歐陽巧瑩 #黃子雄 #康華 #劉江 #黃致豪 #張彥博 #鄧佩儀 #陳振華 #張曦雯 #林秀怡 #林夏薇
