呢個訪問攝於2013年8月3號，當時我入行1年左右，呢次應該係入行以來訪問過最大名氣嘅運動員。
成長時一直唔係高比fans，所以喺訪問前無嗰種訓唔著或者好期待佢答乜嘅感覺，反而聽師兄伍家謙同行內人分享返過往經驗，Kobe係一個會做足「門面嘢」嘅人，佢話高比會先問公關嚟緊訪問佢嘅記者叫咩名，然後會主動叫名打招呼，甚至第二次訪問佢可能會記得個名添，所以我就即管睇吓訪問時會係點。
當時家謙仲喺無綫新聞部，於是Nike就將我哋安排喺同一個時段一齊問問題。而由於節目風格關係，<<體育世界>>主張主持同記者專訪時出鏡，所以家謙就讓咗我坐高比隔離。
高比當日心情好好，一見面雖然佢無叫我名 (當然我無特別奢望過)，但佢全程好好笑容，令到我都無乜好緊張嘅感覺，成個訪問好流暢，大約10分鐘左右完成。
老實講，條片喺vo、鋪排同其他後期製作方面，我而家睇返的確有好多嘢可以改善，畢竟一年生技術有限，多多包涵。不過淨係睇啲畫面都夠晒經典，例如仲有Nike League、修頓未裝修，好多籃球仔有啲打緊甲一或者退出埋籃圈了，大家可以認下佢哋認下自己。
7年前，高比已經提醒我哋，要忠於我哋熱愛嘅事，先有動力 "Get better"，事隔7年，呢個Mamba Mentailty 我仍然記住的，可惜嘅係，我無辦法訪問你第二次，證實唔到到底握手時會否嗌出我個名字，不過無論如何，你嘅名字已經牢牢喺我心中、喺我生活當中，Mamba Forever。
#KobeBryant
#BlackMambaNight
#MambaForever
#體育世界
