《其實我好贊成重新執行當年嘅「中三淘汰試」》
年紀細嘅朋友可能唔知道，而家香港教育制度係三三四，以前行英制係五二三，五年中學，兩年預科三年大學。以前並唔係坐定笠六可以完成form 5 考會考，中三係有次淘汰試，如果考得太差就bye bye。而我一直都覺得呢個中三bye bye 概念係好應該繼續執行。
儘管香港嘅教育制度係成pat 屎咁，香港嘅普及教育係ok 架，免費教育係令所有人都有基本嘅知識水平。老老豆豆，當你完成中三，基本野你真係學哂，中三選科後，選修科個啲野基本上唔係應付生活所需，係應付考評局所需。而其實根本唔係人人都岩考試，好多人初中已經好吃力。
好多國家，就算冇中三淘汰試，都有初中考高中嘅考試，好似中國同日本，學生完成左初中，就考心儀嘅高中。呢個考試係重要嘅，佢係可以及早分流學生，冇能力升讀傳統高中課程嘅學生，可以入讀職訓學校，準備投入職場。
※※※※※※※
香港中學制度最大嘅問題，就係學生冇喺完成初中之後分流...
而家香港地所有完成初中嘅學生，如無意外都會升上同一中學讀高中。呢個舉動，根本係捱時間，等個學生捱到18 歲成年。真係要等足6 年，等到佢地考DSE，先可以知道佢地唔岩讀大學？
大家都心知肚明，其實去到中三，已經好明顯知道有啲學生係冇力進級，逼佢再上一層樓，根本係hea 多佢三年。呢三年高中，的確係可以hea 大佢，但係代價除左虛度光陰，更加係磨蝕一個年青人嘅心志。你不斷叫一個讀唔到跟唔上嘅人努力啲，不停俾個假希望佢，呃佢努力啲 就會考到大學，根本係騙局。
最大嘅騙局莫過於呃呢班根本唔岩讀書嘅人讀完高中，考完DSE，仲同佢地講可以讀asso 升大學，成個騙局係等於已婚嘅男人呃個二奶有一日會離婚一樣，真係時間愈拖得長，陷得愈深。
※※※※※※※
點解唔係人人都需要高中同大專大學等高等教育？
其實我覺得呢個世界上，所有工只有分兩種，一種係「你點人」，即係管理諗橋嘅人，另一種就係「人點你」，即係執行啲橋嘅人。大部份高等教育都旨在培育第一種人，管理階層，例如酒店管理，工商管理，市場學。問題係，呢個世界根本就係管理嘅人少，俾人管理嘅人多。正如一間物業管理公司，物管主任梗係幾丁人，security梗係成群人。
唔係讀書嘅材料，勉強hea 時間，捱到上去讀高等教育，最終都唔會做到管理階層，只會變左想做管理階層但力有不逮，俾人管理，又會條氣唔順浪費左時間讀到asso。
香港嘅教育係同職場應用完全脫軌...
高等教育制度，只係提供少於合大學資格20%嘅學生資助大學學位，然後不停鼓勵其他根本連高中都跟唔上嘅後生仔自資讀asso，讀完哂管理人嘅學位，又冇對應管理人嘅職位俾佢地。呢個情況就好似我細個做英文exercise 連線咁，明明左右八個，應該match 到each other，但通常我連左一個之後，就發現其他個個都唔係好岩痴埋一齊。
教育唔係只有一個destination，而係應該好似香港國際機場咁，destination 眾多，而且可以俾人按需要轉機。所以我好贊成教育課程多樣化...最少多返啲職訓學院呀。
點解中三完成初中後就應該分流？原因好簡單，後生。就好似日本johnny 事務所咁，十四五歲開波，就算你入錯左johnny 事務所，發錯明星夢，玩幾年你都只係岩岩18 歲，仲可以試下玩其他技能。一個學生冇啦啦讀唔上高中，夾硬要讀到中六，冇啦啦要讀個十幾萬嘅asso，畢業先發覺冇用，到時都廿幾歲啦，仲有咩青春試學其他技能呢？
※※※※※※※※
最後係，取消中三淘汰試應該係所有老豆老母嘅意願，因為所有老豆老母都有四方帽情意結，覺得大學沙紙好有體面，其實，大學學位同沙紙，就好似過年盒金莎同花紙咁，去來威架渣，冇用架。
我尋日見到聖雅各就業及培訓服務搞免費全日制課程 – 「點心製作員基礎證書」，老實講，中學我最喜愛科目真係cookery，如果俾我讀完初中，問我想讀文理商定cookery，我會選cookery。呢個點心製作班只係其中一個出路，但我會問，點解政府唔提供「俾好多錢先埋到單嘅asso」以外嘅出路呢？
PS. 呢個點心製作班，令我記起中三一次cookery 堂，miss 時教整叉燒包，我每個過程都非常成功，但一打開個蒸籠，再meet 開個包，我見到有條頭髮原條標出來，真係嚇到我個心離一離之外，好想嘔 ...
