Dear Jane（親愛的珍）日前完成五場紅館演唱會，主音阿Tim嘅老婆楊洛婷（A.I. Rabee’a）落力撐場，化身妹豬粉絲舉「I❤️老公」之餘，今日仲寫咗篇感想文，分享佢見證Dear Jane高山低谷嘅經歷。當中A.I. Rabee’a仲自爆曾遭舊公司迫去整容，因為唔肯最後搞到俾人雪！楊洛婷本身幾靚女，咁都要整？
佢寫道：「曾經有一段時間，我被舊公司不斷無理咁迫我去整容，因為我唔肯妥協，唔肯就犯，所以就被人無情咁『掟入雪櫃』，結果我冇工作冇收入。」「當時我老公就好型咁同我講😎，佢會用佢嘅所有能力去照顧我。的而且確，我老公絕對有履行佢對我嘅承諾，而幸運嘅係，我精彩嘅主持生涯亦隨即展開。呢個就係我哋❤️愛情故事嘅開始。」楊洛婷其後亦都轉型做活動MC，喺主持同司儀界好吃香。
彈bass嘅Jackal喺演唱會話每次都驚無人買飛，阿嫂A.I. Rabee’a話以前都會有呢個擔心，所以每次開騷佢都會主動叫朋友買飛支持，不過今次情況相反，唔洗開聲都有成班朋友搵佢買飛：「連餐廳侍應、幫我整電話嘅師傅等等都搵我買飛！」坐緊月嘅A.I. Rabee’a出盡力幫手撲飛，見證住Dear Jane高山低谷嘅佢就話：「我真心為Dear Jane感到無比光榮同驕傲！好愛呢四個男人！」
